ZCC e hweditše thibelo ya kgorotsheko kgahlanong le Michael Serepo, yo a bolelago gore ke morwa wa Bishop Lekganyane
Ka Mogale Mohale
Kereke ya Zion Christian Church (ZCC) e ganana le polelo ya gore Michael Kgotso Seropo yo a tsebegago ka leina la Maditobane Barnabas Lekganyane ke ngwana wa moetapele wa kereke, His Grace, The Right Reverend Bishop Dr BE Lekganyane.
Se se tla ka morago ga ditatofatšo tša Seropo, moetapele wa kereke ya Zion Creationist Church tša gore ke yena morwa wa Bishop Lekganyane, ebile kereke ya gagwe e na le kamano le ya ZCC.
Mmoleledi wa ZCC, Moatshe Ngoepe o re Lekganyane o hweditše taelo go tšwa kgorokgolo ya tsheko ya Pretoria ka kgwedi ya Phupu 2024 yeo e thibelago Seropo go apara moaparo go ba go šomiša didirišwa tša ZCC kopanong ya kereke ya gagwe.
Se ke ka ge Seropo a thomile kereke yeo a e bitšago Zion Creationist Church yeo maloko a aparago moaparo wa go swana le wa ZCC.
Ngoepe o re taelo yeo e thibela Seropo go phatlalatša le go ipitša gore ke yena Maditobane Barnabas Lekganyane le gore a tlogele go šomiša maina ao go timetša setšhaba gammogo le go ipitša gore ke yena morwa wa Lekganyane,” a realo.
Ngoepe o re Seropo o hweditše taelo yeo. “Efela o tšwela pele go bolela maaka letlakaleng la gagwe la Facebook gore ke yena Maditobane Barnabas Lekganyane,” a realo.
O re ka Labone, 5 Phupu kgoro ya tsheko e laeditše morongwa gore a balele Seropo gammogo le maloko a gagwe a kereke taelo yeo.
“Morongwa yoo o ile a thibelwa, a tšhošetšwa ebile a hlokofatšwa ke maloko a kereke,” a realo.
Ngoepe o re ba laeditše baemedi ba molao go ya kgorong ya tsheko ka nepo ya go hwetša kimologo ya maleba kgahlanong le Seropo le maloko a gagwe a kereke.
Seropo o iphetoletše letlakaleng la gagwe la Facebook ka gore ga a tsebe gore tše ke metlae go ba bjang.
“A re direng diteko tša DNA, mme baahlodi ba kgoro tša tsheko bao e le go maloko a ZCC ba swanetše go ralokela kgole le taba ye ka gore ba tšeya lehlakore la kereke. Ga ke kwišiši gore kgoro e fihletše sephetho bjang ke se gona,” a realo.
