Badudi ba nyamišwa ke seemo sa ditsela tša bona

Badudi ba motse wa Sephaku kgauswi le Burgersfort ba ikwa ba furaletšwe ka ge ditsela tša mmu di fetogile melete e megolo moo batho ba ka emang ka gare ga yona.

Ditsela tšeo di bego di sepedišega gabotse ga se tša hlokomelwa mengwaga ye e fetago lesome, gomme bjale leeto le fetoga kotsi go ba la se kgonege.

Badudi ba motse wo o fetago a malapa a 800 ba re difatanaga tša bohle le tša maphelo di a senyega mme tša go tliša dithoto tšeo ba di rekilego  di gana go tsena motseng wa bona.

Barutwana ba swanela go sepela ka hlokomelo ge ba feta meleteng yeo, mola batšofe bao ba yago mafelong a maphelo le bona ba sa kgone go fihla.

“Ge pula e na ga go na yo a sepelago, barutwana ga ba ye dikolong le bašomi ba palelwa ke go fihla mešomong,” gwa realo moetapele wa setšhaba, Thobejane Kgaphola.

O re maemong a tšhoganetšo, malapa a lahlegelwa ke maloko a bona ka ge dinamelwa tša tshoganetšo di palelwa ke go tsena. “Ge go na le lehu re swanelwa ke go rwala mohu ka diatla, gomme batšofe ba hlaselwa ke baswa ka ge ba tseba gore maphodisa a tšeya nako go fihla,” a realo.

Kgaphola o re ba išitše mathata a bona go masepala wa Elias Motsoaledi, eupša ga go direge selo. Moemedi wa DA, Nico Pienaar o re ditsela tše di fetogile melete yeo e le go kotsi gomme o tla iša taba ye go Tona ya Dinamelwa.

Mmoleledi wa mmasepala, Simon Makua o netefaditše gore ba a tseba ka seemo sa badudi ba Sephaku. “Lenaneo la go tsosološa ditsela le šetše le thomile.

“Sephaku se akareditšwe ka gare go lenanego la ditšhelete la masepala la mengwaga ye mehlano, eupša re itshepetše kudu ka thušo ya sekhwama sa meago ya masepala,”a realo. Go baagi, melete yeo ke sešupo sa letšatši le letšatši sa go hlokomologwa ke mmušo.