Morwedi yo a iponego molato wa go rulaganya polao ya tatagwe o tla dira aphili kahlolong ya gagwe ya bophelo ka moka kgolegong 

Mologadi Magdeline Mehlape, yo a bonwego molato wa polao ya tatagwe o tla aphila kahlolo ya gagwe ya go golegwa bophelo ka moka.

Mologadi wa mengwaga ye masomepedi seswai wa go tšwa Mankweng ka ntle ga Polokwane ka Limpopo o bonwe molato gomme a ahlolelwa bophelo ka moka kgolegong bekeng ye e fetilego.

Se se tla ka morago ga gore a ipone molato wa go loga maano a polao ya tatagwe Dr Johannes Mehlape ka la 28 December 2023.

Ngaka Mehlape, yo e bego e le Molaodi wa Tikologo wa Kgoro ya Thuto ya Limpopo, o thuntšhitšwe ka gae ga gagwe ka Mankweng.

Polao ya Mehlape e tlile ka morago ga gore Mologadi a belaele go re tatagwe o na le kamano lehung la mmagwe, morago ga go rerišana le ngaka ya setšo mabapi le go hlokofala ga mmagwe.

Ramolao wa gagwe, Moses Manthata, o boletše ka Labohlano gore le ge Mologadi a ipone molato, o tla aphila kahlolo ya bophelo ka moka kgolegong.

 “Ba re file kahlolo ya bophelo ka moka, eupša ga e re thabišere. O tla gopola go re molatofatšwa o sa le yo monyenyane. O na le mengwaga ye 28 fela. Ee, re a dumela gore dilo di ile tša se sepele gabotse. Ga re dumelelane le polao eupša kgaugelo e swanetše go šoma. O ile a ipona molato ka gobane, re be re se na leoto leo re ka emago go lona ge re be re ka tšwela pele ka molato o.”

Go sa le bjalo, Kgorokgolo ya Tsheko ya Polokwane e bušeditše tsheko ya balatofatšwa mmogo ba Mologadi polaong ya tatagwe go fihla ka la 16 Hlakola 2026, go dumelela moahlodi yo moswa go okamela molato o.

Balatofatšwa mmogo ba gagwe ba bane, e lego mmane wa gagwe, Mahlodi Mathole, Sello Molongoana, Hlologelo Mogotlane le Tshepo Ranoto, ba lebane le ditatofatšo tša go loga maanomabe a go bolaya, polao, go thuba, le go swara sethunya le dithunya tšeo di se go molaong.