Kgoro ya Maphelo e tšea magato a kgalemo kgahlanong le ngaka yeo e lekilego go kata mosadi wa moimana

Ka Mogale Mohale

Ngaka e ka gare ga meetse ao a fišago.

Se se tla ka morago ga gore a latofatšwe ka maitshwaro a mampe ka dikgonono tša maitekelo a kato.

 

Ngaka ye e lekile go kata mosadi wa mengwaga ye 22 eo a le go mmeleng sepetleleng sa George Masebe ka ntle ga Mokopane, Limpopo ka Sontaga, 27 Moranang.

 

Tiragalo ye e diregile ka phaphošing ya sonar ka nako ya tekolo ya mpa (abdominal ultrasound). Tekolo yeo ke karolo ya hlokomelo ya mpa.

 

Mmoleledi wa Kgoro ya Maphelo, Neil Shikwambana o re ka hlahlo ya dipolelo tša dinyakišišo tša ka gare, kgoro e tšeri sephetho sa go phara ngaka yeo ka molato wa maitshwaro mpe gomme magato a kgalemo a thomile morago ga gore a leke go kata molwetši.

 

O re sehlopha sa kgalemo se hlomilwe mme ditshepedišo di ya kgatlampana.

 

“Kgoro e tšeya ditatofatšo tša maitshwaro mpe a thobalano ka hloko. Ka morago ga go hwetša ngongorego, re ile ra tšeya magato a ka pela go netefatša gore bophelo bja molwetši yo a amegago bo bolokegile,” a realo.

 

Molekgotlaphethiši wa kgoro, Dieketseng Mashego o amogetše tšwelopeke ye. O re le ge ba ema ka gore motho ga a molato go fihla o bonwa molato, ba kgahlanong le tshohlego gammogo le maitshwaro mpe mafelong a bona.

 

“Kgoro e ka se bolele go ya pele ka taba ye go šireletša tshepedišo ya seriti gammogo le sephiri sa bao ba amegago,” a realo.

 

Tonakgolo ya Limpopo Ngaka Phophi Ramathuba o kgadile Limpopo Independent Practitioners Association (LIPA) ka go se emelele kgahlanong le balwetše bao ba hlokofatšwago ke dingaka.

 

“Ditatofatšo kgahlanong le ngaka yeo di tshwenya kudu. LIPA bjalo ka lentšu la dingaka, e be e swanetše go ba ya mathomo go kgala tiragalo ye mme e eme ka lehlakoreng la melao le maikarabelo,” gwa realo Ramathuba.