Meepo eo e sego molaong e bea diphoofolo kotsing ka Mopani
Ka Sekerala Seshibe
Selete sa Mopani ka Limpopo ga se se tlale ka meepo, eupša moepo wa gauta wa Modipa wo o tswaletšwego ka Gravelotte ka ntle ga Tzaneen o sa tšwa go goketša bašomi ba meepong bao ba sego molaong go tšwa ka dinaga mabapi.
Moepo o, o tswaletšwe mengwaga ya go feta ye lesome gomme bjale bašomi ba meepong bao ba sego molaong kudu ba go tšwa Zimbabwe, Lesotho le Mozambique ba šoma moepong oo, se ase kgahlišego kudu balemirui ba diruiwa metseng ya kgauswi.
Go thwe bašomi ba meepong bao ba sego molaong ba na le bokgoni bjo bogolo bja go epa gauta, ba itlhamile kudu e bile ba kotsi kudu.
Maloko a setšhaba are bašomi ba ba meepong ba epile mekoti ye mmalwa ka mašemong a phulo gomme se se hlola kotsi ye kgolo go diruiwa tša bona tšeo tše dingwe di welago ka gare ga mekoti e.
Modudi e lego John Xipalana o boletše gore dikgomo tša gagwe tše pedi di ile tša wela ka meleteng ye gomme tša robega maoto.
“Bašomi ba meepong bao ba sego molaong ba hlola tshenyo ditšhabeng tša rena. Karolo ye kgolo ya naga ya phulo e tletše ka melete gomme ye mengwe ya yona ke ye megolo kudu. Ge diphoofolo di fula kudukudu bošego, di wela ka meleteng yeo. Re hlohleletša ditheo tša phethagatšo ya molao go šomana le batho ba,” a realo.
Sehlophatšhomo sa SAPS seo se hlomilwego go lwantšha meepo yeo e sego molaong, Operation Vala Umgodi e netefaditše gore ba šomana le bašomi ba meepong bao ba sego molaong ba kotsi bao ba tsebago go efoga go swarwa ga maphodisa.
Mokapotene Siddy Mathebula, moetapele wa sehlopha sa mošomo seleteng sa Mopani, ore go nyakega maatlafatšo ye ntši gore ditiro tša bona di atlege.
Mathebula o boletše gore ba lemogile meepo ye 12 yeo e tlogetšwego ka Mopani le Seleteng sa Vhembe.
“Bašomi ba meepong bao ba sego molaong ba senya tikologo. Re be re dutše re amogela dingongorego go tšwa go badudi ba motse wa selegae ba re bašomi ba meepong bao ba sego molaong ba epa lefelong ka moka la phulo. Ke nnete gore diruiwa di amilwe gampe ke meepo ye yeo e sego molaong. Bašomi ba meepong bao ba sego molaong ba na le bokgoni bjo bo fetago rena gomme kgotlelelo ya bona bokgoning bja sešole ke tšhošetšo ye kgolo go rena. Le ge go le bjalo, ga e sa le go tloga fao re tšere didirišwa tša bona tša meepo,” a realo Mathebula.
