Modulasetulo wa Seshego Community Against Crime And Gangsterism, Vincent Kunutu o tla bolokwa ka letšatši la gagwe la matswalo ka Mokibelo, 16 Phato

Dithulaganyo tša segopotšo le poloko ya modulasetulo wa Seshego Community Against Crime And Gangsterism (SCACAG) di lokollotšwe.

Dithapelo tša go tshediša ba lapa di tla swarwa lapeng la gagwe go la Zone 2, Seshego  ka Labone, 14 le Labohlano, 15 Phato ka 6pm.

Poloko e tla swarwa ka letšatši la gagwe la matswalo e le go Mokibelo, 16 Phato go la Ngoako Ramahlodi Sports Complex ka 11am.

Lehu la gagwe le tsebagaditšwe ke mošomimmogo ka yena ebile e le mogwera wa gagwe, Slight Mabotja ka Mokibelo, 9 Phato yo a boletšego gore lehu la gagwe ke tahlegelo e kgolo go mokgatlo le go setšhaba ka kakaretšo.

Kunutu o be a hlomphwa kudu Seshego, Moletjie le Polokwane ka lebaka la boneelo bja gagwe go kaonafatša bophelo bja setšhaba.

Ka fase ga boetapele bja gagwe, SCACAG e bile lentšu le maatla go lwantšha dihlopha tša digongwana, diritifatši le bohodu, gantši a šoma mmogo le maphodisa go bušetša khutšo le tšhireletšo motseng.

Lehu la gagwe le hlalositšwe bjalo ka “tahlegelo e kgolo” go ntwa ya go lwantšha bosenyi tikologong, gomme mediro ya go mo gopola e tšwela pele go tšwa go baagi, bašomi ba setšhaba le mekgatlo ya boitekanelo.

Meyara wa masepala wa selete sa Capricorn, Mamedupi Teffo o re lerato leo Kunutu a be go a na le lona go setšhaba sa Seshego le dinaga mabapi le tla dula le gopolwa.

“Re leboga thekgo ya gago go ntwa kgahlanong le tshohlego ya bong le tšhomišo mpe ya diritibatši. Robala ka khutšo ntate Kunutu,” gwa realo Mamedupi.