Ramaphosa o ka Kapa Bohlabela go etela ditšhaba tšeo di amilwego ke mafula

Mopresidente Cyril Ramaphosa o fihlile ka Mthatha ka Kapa Bohlabela, moo a tla etela mafelo ao a amilwego ke mafula. 

Mopresidente, a felegetšwa ke tona ya CoGHTA Velenkosini Hlabisa le Tonakgolo, Oscar Mabuyane o tla bea leihlo kgatelopele ka ga karabelo ya mmušo le go dirišana le ditšhaba tšeo di amegilego.

Ramaphosa o laeditše manyami a gagwe ka go lahlegelwa ke maphelo gomme a fetišetša matshidiso a go tšwa pelong go malapa ao a hwetšwego, ditšhaba tše di amegilego, le badudi ba Kapa Bohlabela ka kakaretšo.

 Matšatšing a sego kae a fetilego, dipula tše di sa kgaotšego, diphefo tše matla le go theoga ga naga di tšere maphelo ka tsela e nyamišago gomme tša baka tshenyo e apareditšego go ralala le ditšhaba, kudu-kudu mebasepaleng ya selete ya OR Tambo le Amathole.

Go fihla ga bjale, batho ba 78 ba lahlegetšwe ke maphelo a bona, gare ga bona go na le bana ba sekolo bao senamelwa sa bona sa se ilego sa gogolwa ke meetse a mafula ka Labobedi.

Mmoleledi wa Mopresidente, Vincent Magwenya ore Ramaphosa o dula a tsebišwa ke Hlabisa le Tonakgolo Mabunyane ka ga maitapišo a go nyaka le go phološa bao a amilego ke mafula, le go mo tsebiša ka thekgo ya tlaleletšo e  ka nyakegago go arabela ka botlalo go ralala le maemo ka moka go masetlapelo a senyago.

Ramaphosa o thomile ketelo ya gagwe ya bolebeledi mafelong ao a amilwego ke mafula a felegetšwa ke Hlabisa, Mabuyane, le baetapele ba go arabela masetlapelo.