Bagononelwa go akaretšwa le ngaka ya setšo ba golegilwe ka morago ga go tšeya le go iša banna komeng ka kgang

Ka Mogale Mohale

Maphodisa a golegile bagononelwa ba bararo go akaretša le ngaka ya setšo ka morago ga go tšeya banna ba bararo ka kgang, ba ba iša komeng ka kgang.

 

Bagononelwa ba ba thomile ka go hlasela motšofe, Mantlakane Mathobela (71) motseng wa Mamatsha go la Ga-Molepo ka ntle ga Polokwane, Limpopo ka Sontaga, 6 Mosegamanye nakong ya ge ba mo hwetšwa a iketlile ka lapeng la gagwe.

 

Ba ile ba mo latofatša ka go šitiša merero ya koma mme ba thoma go mo tlaiša. Mathobela o ile a tšwa dikgobalo tše šoro gammogo le go robega letsogo pele a ka išwa komeng ka kgang.

 

Go tloga moo monna o mongwe o ile a hwetša molaetša gotšwa go ba lapa gore sehlopha sa batho se kgobokane lapeng la gagwe.

 

O rile ge a fihla a kgokwa ka thapo pele a ka lokelwa ka gare ga sefatanaga a išwa komeng ntle le tumelelo ya gagwe.

 

Mmoleledi wa maphodisa a Limpopo, Colonel Malesela Ledwaba o re mohlokofatšwa wa boraro (40) o ile a tlaišwa ka morago ga gore sehlopha sa banna se tsene ka lapeng la gagwe ka dipatla ntle le hlalošo.

 

“Bagononelwa ba bararo go akaretša le ngaka ya setšo ba mengwaga ye 34, 37 le 47 ba golegilwe ka Mošupologo, 14 Mosegamanye ka morago ga dinyakišišo tša go tsenelela,” a realo.

 

Ba ile go tšwelela pele ga kgoro ya tsheko ya Mankweng ba lebagane le melato ya go tlaiša ka maikemišetšo a go ntšha dikgobalo, go tlaiša le go gapeletša motho go ya komeng ka kgang.

 

“Bagononelwa ba bangwe ba ka golegwa mme dinyakišišo di tšwela pele,” gwa realo Ledwaba.

 

Mokhomišinare wa maphodisa a Limpopo Lieutenant-General Thembi Hadebe o amogetše go golegwa ga bagononelwa ba mme a kgala ka bogale ditiro tša bona.

 

“Re dumela bohlokwa bja koma, efela ga se ya swanelwa go šomišwa bjalo ka sebetša sa go tšhošetša, dikgaruru le kgapeletšo. Maphodisa a ile go šoma ka thata go šireletša setšhaba,” a realo.