Badudi ba latofatša mmasepala ka gore ga o na taba le bona ba dula ka gare ga kelelatšhila

Ka Mogale Mohale

Mengwaga ye lesome ka moka, badudi ba  gapeletšega go kgotlelela monkgo go tšwa go kelelatšhila mebileng ya motse.

 

Mantle ao a elela le mebiggʻgla ya motse wa Mahonisi ka ntle ga Elim, Limpopo mme se se thatafiša maphelo a badudi.

 

Badudi ba re ba dula matšhileng gomme ba boifela maphelo a bona. Ba palelwa ke go bula matsikangope a bona ge ba le ka malapeng, ka fao ba gapeletšega go dula ba ke tswaleletše.

 

“Seemo se se boima ka gore re phela bjalo ka diphoofolo. Ga re duli ka khutšo ka lebaka la monkgo. Ga re tsebe gore re dirile eng go phela ka fase ga seemo se,” gwa realo David Mononela (44).

 

Ba bangwe ba re monkgo wo o kwagala kudu bošego mme o dira gore go be boima go robala.

 

“Re dula re netefatša gore malapa a rena ga a na mašoba moo monkgo o ka tsenago gona. Badudi ba dula ba belaela ka mpšhikela le letšhologo, mme ba gonona gore kelelatšhila yeo e na le seabe,” gwa realo modudi (36).

 

Ba re dikolobe di ja kelelatšhila yeo, ka fao ba boifa go di hlaba gore ba di je.

 

Le ge badudi ba ngongoregile masepaleng wa selete sa Vhembe, ba re ga gona seo se dirwago go lokiša bothata bjo.

 

Mokhanselara wa Democratic Alliance masepaleng wa Makhado, Glenda Furumele o re ba ile go ngwalela masepala wa selete go tseba gore bothata bjo bo ile go tšeya nako ye kaakang go lokišwa.

 

“Re ile go bula molato ge re ka se hwetše dikarabo tša go hlaka,” a realo.

 

Mmoleledi wa masepala wa Vhembe, Moses Shibambu o re tshepedišo ya kelelatšhila e tswalelegile ka lebaka la go lokelwa tšeo di sa nyakegego.

 

“Masepala o boletše le malapa ao a tsenetšego tshepedišo ya kelelatšhila ntle le molao gore ba ile go hwetša kotlo. Tshepedišo yeo e ile go matlafatšwa go tloga go 160mm go ya go 200mm pele ga kgwedi ya Lewedi 2025 e ka feta,” a realo.