Rachel Kutumela yo go thwego ke mmolai wa inšorense o latofatšwa ka go leka go dira gore ba lapa le bagwera ba tšee dipholisi tša inšorense go batho ba bangwe a le kgolegong

Lephodisa la mosadi leo le swerwego ngwagola ka ditatofatšo tša bofora bja inšorense, go begwa gore o tšwetše pele go hlohleletša ba lapa le bagwera go tšea dipholisi tša inšorense ya bophelo go ba bangwe le ge a sale ka kgolegong.

Se se utolotšwe ke mohlankedi wa dinyakišišo molatong o, Captain Keshi Mabunda kgorong ya tsheko ya bomaseterata ya Polokwane ka Laboraro. 

Sajene Rachel Kutumela, kgaetšedi ya gagwe Anna Shokane le morwedi wa gagwe Florah Shokane ba ile ba tšwelela kgorong ya tsheko gape ka tšwetšopele ya theeletšo ya bona ya kgopelo ya peile.

Boraro bjo bo swerwe ka kgwedi ya Diphalane ngwagola gomme ba latofatšwa ka go hwetša poelo ya R10 milione ka mahu a batho ba senyane. 

Ba ganeditše go kgatha tema dipolaong tše eupša ba dumetše go tšea dipholisi go ba bangwe ba bahu le go amogela ditefelo go tšwa go diinšorense. 

Mabunda o kile a botša kgorotsheko ye gore dihlatse tša gagwe di ka ba kotsing ge yo mongwe wa basekišwa a ka lokollwa ka peile.

Mabunda o boditše kgorotsheko gore Florah o be a šitišana le dihlatse go tloga mola a swarwago.

O boletše gore o boifa gore a ka gobatša bao ba sa dirišanego le yena.

Ge a hlatsela kgorong ya tsheko, Mabunda o boletše gore go na le bohlatse bja gore dinyakišišo di bontšhitše gore go na le kgonagalo ya gore boraro bjo bo ka dire bosenyi bjo bo swanago gape ge ba lokollwa ka peile. 

 “Ba kgopetše batho ba bangwe go tšea dipholisi legatong la bona. Ge e le gabotse, yena (a šupa Kutumela) ka ge re bolela ka yena, o ile a hlohleletše batho ba bangwe go tšea dipholisi legatong la gago gomme a tshepišitšego gore o tla di patela ,” Mabunda o boletše. 

Theeletšo ya kgopelo ya peile e ile ya bušetšwa morago kgweding ye e tlago.