Mosadi o swerwe ka lebaka la polao ya ngwana wa gagwe  

Maphodisa a Bandelierkop ka fase ga Selete sa Vhembe a golegile mosadi wa mengwaga ye masomepedi morago ga lehu la lesea la gagwe la dikgwedi tše tharo ka Labohlano la di 01 Phato 2025.

Mmoleledi wa maphodisa Captain Malesela Ledwaba o re ba be ba le mošomong ya go paterola ge ba bitšwa kliniki ya Vleifontein morago ga go tsebišwa ka batho ba babedi bao ba tlišitšego ngwana yo a hlokofetšego lefelong leo. 

 “Ge ba fihla, mohlankedi wa tša kalafo o ile a šupa setopo sa ngwana mpeteng. Batho ba babedi b tsebišitše maphodisa gore ba br ba dutše ka ntle ga ntlo le mogononelwa a swere ngwana.”

 “Dipego di šišinya gore ge ba dutše, mogononelwa o ile a tšea ngwana gomme a tsena ka ntlong gomme ka morago ga metsotso ye mmalwa ba ile ba tsena ka gare go mo lekola. Go thwe ba hweditše mogononelwa a dutše fase gomme a kgama ngwana,” Ledwaba a tlaleletša.

 Ba ile ba kitimišetša lesea kliniki ya lefelong leo gomme la hwa ka baka la dikgobalo tša gagwe.

Maikemišetšo a tiragalo ye ga a tsebje gomme mogononelwa wa mengwaga ye masomepedi yo e lego wa leloko la mohu o tla tšwelela pele ga kgorotsheko ya Mmaseterata wa Makhado kgauswinyane a lebane le molato wa polao.