Nelson Letsoalo o ahloletšwe bophelo bja gagwe kgolegong molatong wa go kata ngwanenyana

Nelson Letsoalo (46) o tla fetša bophelo bja gagwe ka kgolegong.

Se se latela ka morago ga ge a ahlotšwe ke kgorotsheko ya Tzaneen, Limpopo ka Labone, 31 Mosegamanye molatong wa go kata ngwanenyana wa mengwaga ye 12.

Ka ngwaga wa 2013, motšwasehlabelo o be a etetše koko wa gagwe go la Kgapamadi Section kgauswi le Bolobedu gomme koko a mo fa tšhelete gore a ye go reka dilo tše botse.

Motšwasehlabelo o ile a ya lebenkeleng leo le lego kgauswi le lefelo la go rekiša madila. Ke moo Letsoalo yo a bego a tsebja ke motšwasehlabelo bjalo ka mothuši wa go hlwekiša, a mmitsa gore a tsene ka gare ga lefelo leo.

Mmoleledi wa maphodisa a Limpopo, Colonel Malesela Ledwaba o re ge a tsena, Letsoalo o ile a gapeletša motšwasehlabelo gore a robale fase, gomme a mo kata.

“Ka morago ga tiragao yeo, o ile a mo tšhošetša ka lehu ge a ka bolela le motho ka taba ye,” Ledwaba o realo.

Ledwaba o re morago ga tiragalo ye, motšwasehlabeo o ile thoma go ba le kgatelelo ya mogopolo go fihla ka di 4 Pherekgong 2020 ge a begela mmagwe seo se mo diragaletšego.

“Ba babedi ba ile ba kitima ba ya maphodiseng a kgauswi go bega molato wa kato. Ka letšatši le latelago, 5 Pherekgong, Letsoalo o ile a swarwa ka lapeng la gagwe go la Ga-Kgapane gomme molato wa fetešetšwa go mphodisa a Tzaneen. Sergeant Auldah Tintswalo Vukeya o ile a abelwa go hlahloba taba ye ka botlalo,” gwa realo Ledwaba.

Letsoalo o ile a tšwelela pele kgorongtsheko makga a mmalwa go fihla a hwetša beile `ya R1 000.

“Ka bokgoni bja gagwe bjo bogolo bja dinyakišišo, Sergeant Vukeya o netefaditše gore Letsoalo o bonwa molato mme a dula kgolegong bophelo bja gagwe ka moka,” a realo.

Mokhomishinare wa maphodisa a profense, Lieutenant-General Thembi Hadebe o retile sephetho sa kgorotsheko, a re se tla thuša go tloša bosenyi bja batho ba go dira ditiro tše mpe bjalo ka tše tša Letsoalo.