Lesea le hweditšwe le fišitšwe lorelore
Maphodisa a thomile dinyakišišo ka morago ga ge setopo sa lesea la beke tše pedi se hweditšwe se fišitšwe ka mollo motseng wa Mashobohleng go la Moletjie ka ntle ga Polokwane ka Labohlano, 5 Lewedi.
Go ya ka maphodisa a Limpopo, mapodisa a go tšwa Seshego ba bitsitšwe lefelong la kotsi kgauswi le sekolo sa kgauswi ka nako ya 15:45, moo setšhaba se hweditšego lesea le le swele la go šiiša. Lebaka la polao ye ga le tsebjwe gabotse ka se sebaka.
Mokhomišinare wa maphodisa a profense, Lieutenant-General Thembi Hadebe o galefile kudu ka kotsi ye gomme a e hlaloša bjalo ka “bosenyi bja mahlomola,” a ba a hlaba lešata ka ga ditaba tša go lahla goba go bolaya masea mo profenseng.
“Ge o belegile ngwana gomme wa lemoga gore ga o nyake go mo hlokomela, go bohlokwa go ikgokaganya le Kgoro ya Hlabollo ya Leago gore e go fe keletšo ka ga go amogetšwa ga bana, go ena le go bolaya madi ao a senago molato,” gwa realo Hadebe.
Maphodisa a kgopela motho ofe goba ofe yo a nago le tshedimošo ka ga kotsi ye gore a ikgokaganye le Mohlahlobi, Warrant Officer Calvin Magoro go 084 411 8008, goba a letšetše 08600 10111. Diyakišišo di tšwela pele.
