Maloko a kereke a tsietšwe morago ga gore moago wa kereke ya bona o swe lorelore
Maloko a kereke a kgakanegong mme ga ba tsebe gore ba ile go roriša le go rapela Modimo kae.
Se se latela ke ka morago ga gore kereke ya bona motseng wa Muledane ka ntle ga Thohoyandou e fišwe ke mollo ka Laboraro mesong, 10 Lewedi. Ga bjale maphodisa a nyakišiša molato wa go fiša ka boomo.
Go ya ka dipego, mollo o thomile ka iri ya bo tshela, mme wa tlogela moago o swele lorelore. Ka nako yeo moruti wa kereke a fihla morago ga go hwetša molaetša, o hweditše moago wa kereke o phutlame.
Mmoleledi wa maphodisa a Limpopo, Brigadier Hlulani Mashaba o re maphodisa a ile a thoma ka go bula molato wa dinyakišišo, eupša ka morago ga dinyakišišo tša mathomo ka Mošupologo, 15 Lewedi, molato wa fetošetšwa go wa go fiša ka boomo.
“Dilo tšeo di senntšwego ke mollo di lekanyeditšwe ka godimo ga R650 000. Lebaka la mollo ga le tsebegi ka se sebaka efela le tla lekodišišwa ke dinyakišišo tšeo di tseneletšego tša maphodisa,” a realo.
Mashaba o re maphodisa a Thohoyandou a kgopela setšhaba go thuša ka tshedimošo yeo e ka thušago go hwetša bao ba amegago.
“Yo mongwe le yo mongwe yo a nago le tshedimošo a ka ikgokaganya le mohlahlobi wa molato, Constable Rendani Tshavhungwane go 072 189 2544, goba a lešetše 08600 10111,” gwa realo Mashaba.
