Morwedi o ahloletšwe bophelo ka moka kgolegong polaong ya tatagwe

Kgorokgolo ya tsheko ya Polokwane e bone molato le go ahlolela Mologadi Magdeline Mehlape (29)  kgolegong bophelo ka moka ka morago ga gore a ipone molato wa polao ya sehlogo ya tatagwe, Dr Malekutu Johannes Mehlape.

 

Ngaka Malehlape e be e le Molaodi wa Tikologo Kgorong ya Thuto ya Limpopo. 

 

O bolailwe ka December 2023 lapeng la ga gagwe ka Mankweng Zone 1, ka ntlenyana ga Polokwane. 

 

Mehlape o ile a ipona molato ditatofatšong tša polao le go thuba. 

 

Kgorotsheko e kwele gore Mehlape o rulagantše polao ye morago ga gore ngaka ya setšo, Hlologelo Klaas Mogotlane are tatago Mehlape o na le letsogo lehung la  mmagwe. 

 

Ka morago ga gore maiteko a go itefeletša ka go šomiša mekgwa ya setšo a padile, Mehlape o ile a kgopela thušo ya maloko a go fapafapana a lapa go thwala mmolai wa kontraka. Mmolai o ile a hwetšagala gomme a dumela go bolaya Dr Mehlape ge a ka lefiwa R200,000.

 

Bošegong bja tiragalo yeo, Mehlape o ile a notlolla kgoro le lebati le legolo, a dumelela basenyi go tsena ka ntlong.  Mohu o ile a thuntšhwa makga a mantši ka borobalelong bja gagwe gomme a utswetša dilo tše mmalwa tša bohlokwa, go akaretša le sellathekeng sa gagwe.

 

Ka morago ga kahlolo ya gagwe, Mehlape o ile a kgopela tshwarelo go lapa la ga gabo. O ile a bolela gore o be a na le kgoga kgogano tšeo di sa rarollwago le tatagwe.  

 

Lega go le bjalo, motšhotšhisi wa wa bosetšhaba Muneiwa Ratshibvumo o ile a bolela gore go ipona molato ga Mehlape o hlohleleditšwe ke bohlatse bjo bo tseneletšego go e na le go itshola.  

 

Ratshibvumo o hlalositše polao yeo bjale ka yeo e šiišago.

 

Kgorotsheko e ile ya mo ahlolela bophelo ka moka kgolegong ka lebaka la polao le mengwaga ye 15 kgolegong ka lebaka la go thuba.

 

Balatofatšwa ka yena, e lego Tshepo Gabriel Ranoto, Hlologelo Klaas Mogotlane, Mahlodi Melida Mathole, le Michael Sello Molongoane, ba lebane le ditatofatšo tša go loga maanomabe a go bolaya, polao, go thuba ka mabaka a go gakatša, le go swara dithunya tšeo di sego molaong. 

 

Tsheko ya bona etla thoma ka June 20, 2025.