Lapa la mohu Vincent Kunutu le kgopetše tshwarelo go meyara wa masepala wa Polokwane, John Mpe morago ga gore a ganetšwe go bolela tirelong ya poloko

Lapa la mohu Vincent Kunutu le kgopetše tshwarelo go meyara wa masepala wa Polokwane, John Mpe.

Se se latela morago ga gore Mpe a kopane le lapa la Kunutu ka morago ga tirelo ya poloko ya Kunutu yeo e bilego le dipelaelo mafelelong a beke.

Kopano ye, yeo e bego e kgopetšwe ke lapa ka Labobedi, 19 Phato e diregile ka morago ga dingongorego tša gore lenaneo la poloko ga se le sepetšwe ka moo lapa le be le rulagantše ka gona.

Mmoleledi wa lapa, Abel Kunutu o re lapa le nyamile kudu ka seo se diregilego ka ge dikarolo tše dingwe tša lenaneo di ile tša tlogelwa ka lebaka la ditšhitišo tšeo di bakilwego ke batho ntle le tumelelo ya lapa.

“Re kwele bohloko ka ge seboledi seo re bego re se beile mo lenanegong se ile sa tshelwa. Se e be e se tumo ya rena. Go tloga mathomong, meyara o bile le rena, a re fa le moago wa masepala gore re sware tirelo,” gwa realo Kunutu.

Mpe o be a le lenanegong bjalo ka omongwe wa diboledi, efela mosepetša tirelo Kwenisto Makgakga a gana go fa Mpe Sebaka sa go bolela. “Nkase gwante kgahlanong le wena ka Laboraro, ka Mokibelo wa tla wa bolela lehung laka,” gwa realo Makgakga nakong ya poloko.

Kunutu o ile a kgopela tshwarelo go meyara le masepala, a gatelela gore ditšhitišo tšeo e be e se tša lapa, eupša e le maiteko a batho ba bangwe bao ba bego ba nyaka go šomiša seemo sa lapa mabakeng a bona.

Mpe o amogetše kgopelo ya tshwarelo, a leboga lapa ka go kgona go hlaloša taba ye le ge ba sa dutše ba le bohlokong. O hlalošitše mohu Kunutu bjalo ka motswadi wa setšhaba yo a ineetšego, yoo a bego a šoma mmogo le masepala, kudu kudu mananegong a go lwantšhana le tšhomišo ya diokobatši le madila dikolong tša Seshego.

“Le ge re ka fapana ka dikgopolo, se bohlokwa ke gore re dule re hlomphana gomme re boledišane ka mekgwa ye botse,” gwa realo Mpe. “Re tla dula re ema le malapa le setšhaba ka dinako tša lethabo gammogo le dinako tša masetlapelo.”

Masepala o tiišitše thekgo go ba lapa la Kunutu gammogo le setšhaba ka bophara, gomme wa ema le setšhaba go gopola le go hlompha mohu Kunutu.