Morutwana wa mphato wa boraro o hlokofetše ka morago ga go thulwa ke sefatanaga kgauswi le sekolo sa gagwe

Kgoro ya Thuto ka Limpopo e kwele bohloko ka morago ga gore morutwana wa mphato wa boraro a thulwe ke sefatanaga kgauswi le sekolo sa gagwe.

Morutwana yo wa mengwaga ye 9, yo a bego a ithuta sekolong sa fase sa Pfuxetani motseng wa Mavalani sedikothutong sa Nsami seleteng sa Mopani East o thutšwe ke sefatanaga ka Laboraro, 6 Phato ka morago ga gore sekolo se tšwe. Kotsi ye e diregile dimithara tše 100 kgauswi le sekolo.

Kgoro e re morutwana o ile a išwa bookelong bja Khensani kua Giyani ka lebelo, eupša ka bomadimabe a hlokofala metsotso morago ga go fihla.

Molekgotlaphethiši wa kgoro, Mavhungu Lerule-Ramakhanya o re ba kwele bohloko ka lehu le mme o romela mantšhu a hlobošo go ba lapa, bagwera le baithuti ka yena.

“Ke lehu le bohloko la bophelo bjo bo swanetšego go tšwela pele ka lebaka la bokamoso bjo bo tshepišago. Re inamišitše difahlego le ba lapa la gagwe gammogo le setšhaba sa sekolo nakong ye ya boima,” a realo.

O re ba rometše badirela leago gore ba thuše barutwana le barutiši go fenya bohloko bjo bo dirilwego ke kotsi ye.

Molekgotlaphethiši o dirile pitšo ya tšhireletšo ditseleng, kudu kgauswi le dikolo mme a hlohleletša baotledi gore ba otlele ka šedi kudu ka nako ya go iša le go tšeya barutwana dikolong.

“Re kgopela baotledi ka moka gore ba šome ka tlhokomelo kudu ge ba otlela kgauswi le dikolo. Baithuti, kudu ba bannyane ba swanetše ke go šireletšwa ka dinako ka moka,” a realo.

Tiragalo ye e bohloko gape e gatelela mathata a polokego ya ditsela le go se be le didirišwa tša go fokotsa lebelo la difatanaga kgauswi le dikgoro tša dikolo.

Badudi ba motse wa Mavalani ba kgopela gore go be le ditšhupetso tše di hlakilego dikgorong tša dikolo go fokotsa lebelo le tlhahlobo ya molao ye e bonagalago gore barutwana ba se ke ba hlaselwa ge ba sepela ba eya dikolong.