Bana ba bararo ba hlokofetše ka morago ga go fišwa ke mollo
Go diregile masetlapelo motseng wa Itsani ka ntle ga Polokwane ka Labohlano, 29 Phato ge bana ba bararo bao ba lego magareng ga mengwaga ye mebedi le ye nne ba hlokofale ka morago ga go fiša ke mollo ka phaphošing.
Go ya ka maphodisa a Limpopo, ba hweditše pego ya gore go na le phaphoši yeo e tukago mollo woo bana bao ba lego ka gare ga wona. Ge setimamollo se fihla go tima mollo, go hweditšwe ditopo tša bana di šetše di swele go fihla seemong seo di sa kgonego go hlathwa.
Mmoleledi wa maphodisa a Limpopo, Colonel Malesela Ledwaba o re dinyakišišo tša mathomo di bontšhitše gore bana ba be ba dutše ba raloka kgauswi le phapoši yeo pele ga ge mollo o ka thoma.
“Ga go tsebjwe gore bana bao ba tsene bjang ka phaphošing yeo le gore mollo o bakilwe ke eng. Dinyakišišo di tšwela pele,” gwa realo Ledwaba.
Mokhomišinare wa maphodisa a profense, Lieutenant-General Thembi Hadebe o laetše gore ditsebi di bitšwe go thuša ka dinyakišišo.
O laetše gape le maphodisa go lekola ge e ba batswadi goba bahlokomedi ba bana bao ba ka pharwa ka molato wa go hlokomologa goba go palelwa ke go hlokomela bana.
