Floyd Shivambu o ditherišanong tša go thoma mokgatlo wa gagwe wa dipolotiki

Mongwaledi pharephare wa peleng wa uMkhonto weSizwe Party Floyd Shivambu o tsebišitše lehono gore ditherišano di šetše di thomile mo tshepedišong ya go hloma mokgatlo wa gagwe wa dipolotiki.

 Ge a bolela le boraditaba kua Mhulu Luxury Boutique Hotel ka Midrand ka Labone, Shivambu o boletše gore ba tla ya bathong go bolela le batho ka ga go hlongwa ga mokgatlo.

 Shivambu o boletše gore tshepedišo efe goba efe ya ditherišano le yona e swanetše go araba ka fao mokgatlo wo moswa wa dipolotiki o swanetšego go thekgwa ka ditšhelete. 

 “Dikgweding tše mmalwa tše di tlago, re tla be re rerišana le baetapele ka moka ba setšo le ba kereke. Re tla be re nyaka bohlale bja maAfrika Borwa, go akaretšwa Michael Nkuna, Irvin Khoza, Patrice Motsepe ka ga tlhokego ya go hloma mokgatlo wo moswaa wa dipolotiki. Ge ba dumela, re tla lebelela gore ditekanyetšo tša mokgatlo woo wa dipolotiki e swanetše go ba dife le gore ke eng seo se swanetšego go o fapantšha le mekgatlo ye mengwe ya dipolotiki,” a realo. 

 O okeditše ka gore ga a nyake go hloma mokgatlo wo bjalo ka projeke ya motho ka noši goba le sehlopha sa bagwera.  “Re tlabe re eya fase go bolela le batho.  Bekeng ye e tlago, re ya go tsebiša moko wa boetapele wa ditherišano,” Shivambu o boletše.

Le ge go le bjalo, Shivambu o boletše gore ga a na maano a go rola modiro go tšwa go MK Party.   “Ga se ka rola modiro go uMkhonto weSizwe. Nka se tsoge ke rotše modiro go uMkhonto weSizwe.”

“O tla tšeela bjang sebaka sa go ithuta ka dikgwedi tše tshela seo o bego o sa kgone go ithuta sona ka mengwaga ye lesome ? Ke tsebile go tloga letšatšing la mathomo gore re kgauswi le go thoma leeto la go ithuta le kwešišo ye e tseneletšego,” a realo.