SIU e tšeela Rammino  Selaelo Selota sefatanaga sa mabaibai bakeng sa go utswiwa ga tšhelete ya Lottery

Yuniti ye e Kgethegilego ya Dinyakišišo (SIU) e hweditše taelo ya pabalelo go tšwa go Lekgotla le le Kgethegilego kgahlanong le seopedi sa mmino sa go tuma Selaelo Selota.

Taelo ye ke karolo ya dinyakišišo tše di nabilego ka ga bomenetša bjo bo amanago le dithušo tša Sekhwama sa Bosetšhaba sa Lothari tšeo di beetšwego diprotšeke tša tlhabollo ya setšhaba.

Selota o thibetšwe go rekiša koloi ya Mercedes-Benz C200 Avantgarde, yeo go thwego e rekilwe ka tšhelete yeo e sa šomišwego gampe go tšwa go NLC.

Dinyakišišo tša SIU di utollotše gore koloi ya maemo a godimo ya Selota e rekilwe ka go šomiša ditšhelete tšeo di fapošitšwego go tšwa go di-NPO tše tharo tšeo di amogetšego dithušo tša NLC ka fase ga mabaka ao a belaetšago

Ditšhelete tšeo di be di reretšwe go aga legae la batšofadi le go nea tlhokomelo ya batšofadi diprofenseng tše di fapanego.

Dinyakišišo tša SIU di hweditše gore Mokgatlo wo o sa dirego Poelo (NPO) tše tharo; Senthara ya Setšhaba ya Matieni, Legae la Batšofadi la Lethabong le Ntwa Kgahlanong le Peto le Tlhekefetšo (WAR RNA) e amogetše dithušo tša NLC ka fase ga mabaka a belaetšago.

“Dinyakišišo tša SIU di utollotše gore koloi ya maemo a godimo ya Selota e rekilwe ka go šomiša ditšhelete tšeo di fapošitšwego go tšwa go di-NPO tše tharo tšeo di amogetšego dithušo tša NLC ka fase ga mabaka a belaetšago,” mmoleledi wa SIU Kaizer Kganyago o boletše polelong.

SIU e boletše gore e tla neela bohlatse bjo bongwe le bjo bongwe bjo bo šupago boitshwaro bja bosenyi go Bolaodi bja Botšhotšhisi bja Bosetšhaba gore e tšee magato a mangwe