Monna o golegilwe ka morago ga go hlaba le go bolaya mosadi wa gagwe ka sebetša sa bogale  

Ka Mogale Mohale

Monna wa mengwaga ye 35 o golegilwe ka morago ga go bolaya mosadi wa gagwe.

Tiragalo ye ya masetlapelo e diregile motseng wa Mukovha wa Bale ka ntle ga Thohoyandou ka Labone, 9 Mosegamanye.

Dipego di laetša gore maphodisa a Masisi a ile a bitšwa ke setšhaba mabapi le baratani bao ba be go ba elwa.

Mmoleledi wa maphodisa a Limpopo, Colonel Malesela Ledwaba o re ge ba fihla lefelong la tiragalo ba hweditše motšwasehlabelo wa mosadi a tšwele dintho tša go hlabiwa molaleng mme a le ka gare ga bodiba bja madi.

“Bahlapetše ba pele ba ile ba bitšwa mme ba hlatha mosadi yoo gore o hlokofetše,” a realo.

Ledwaba o re go ya ka dinyakišišo tša pele, baratani bao ba be ba enwa bjala bja mabele nakong ya ge monna a thoma go latofatša mosadi wa gagwe ka bootswa.

“Monna yoo o ile a tšwa nako nyana mme a boya a hlaba mosadi ka sebetša sa bogale molaleng. O ile a tšaba lefelong la tiragalo ka morago ga moo, efela a golegwa lefelong leo a be go a khutile gona,” a realo.

O re maphodisa a nyakišiša molato wa polao ka morago ga tiragalo ye.

“Mogononelwa o ile go tšwelela pele ga kgoro ya tsheko ya Masisi ka Labohlano, 11 Mosegamanye a lebagane le molato wa polao,” gwa realo Ledwaba.