Maphodisa a phološitše lapa la batho ba bane ka morago ga go thopša

Lapa la batho ba bane le phološitšwe ka morago ga diiri tše mmalwa le thopilwe ke banna bao ba swerego dithunya ka Labobedi, 5 Phato motseng wa Mareseleng ka ntle ga Burgersfort.

Go ya ka maphodisa, banna ba bararo bao ba aperego dithiba sefahlego ebile ba ihlamile ka dibetša, ba tsene ka lapeng ba hwetša monna, mosadi le bana ba bona ba babedi ba robetše ka phapošing ya borobalelo.

Banna bao ba ile ba ba tšhošetša, ba ba tlema gomme ba tšwa le bona ka sefatanaga sa bona sa VW Polo e šweu.

Taba ye e begilwe maphodiseng a Burgersfort mme maphodisa a ile a romelwa ka pela, ka taelo ya mokhomišinare wa maphodisa a Limpopo, Lieutenant-General Thembi Hadebe.

Ka tšhomišano le khamphani ya go šetša difatanaga, maphodisa a kgonne go hwetša mo lapa leo le thopilwego gona. Le hweditšwe le bolokegile ntle le kotsi polaseng yeo e lego lefelong la Modjadjiskloof.

Lieutenant-General Hadebe o retile maphodisa ka go ba le sebete, gomme a re go phakiša ka pela ga bona go phološitše maphelo a bao ba thopilwego.

“Tiro ye e bontšha boikgafo bja rena bja go lwantšhana le bosenyi bjo bo šoro le go šireletša setšhaba. Re tlo tšwela pele go šoma ka thata go fihlela batlaiši ba swerwa,” a realo.

Dinyakišišo di sa tšwela pele mme batlaiši ba sa nyamaletše. Maphodisa a kgopela setšhaba go thuša ka tshedimošo ye nngwe le ye nngwe yeo e ka tlišago go swarwa ga bona.

Bao ba nago le tshedimošo ba kgopelwa go ikopanya le Colonel Saleem Wahab go 082 319 9291 goba setiši sa kgauswi.