Hawks e re e tla tšwela pele ka molato kgahlanong le meyara wa masepala wa Polokwane, John Mpe le Makoro Foundation mo nakong ya kgwedi

Hawks e re e hlompha sephetho seo se tšerwego ke kgorotsheko ya godimo ya Polokwane mabapi le go bušetšwa morago ga kgopelo ya tšhoganetšo kgahlanong le meyara wa Polokwane, John Mpe le Makoro Foundation.

Se se latela ka morago ga ge taba ye e ntšhitšwe lenanegong la tsheko ka Labobedi, 29 Mosegamanye gore bakgoboketši ba hwetše sebaka sa go feleletša ka kgopelo gammogo le dipoledišano.

Mmoleledi wa diHawks, Brigadier Thandi Mbambo o re kgopelo ya tšhoganetšo e tla tsenwa lenanegong gape mme e theeletšwe mo bekeng tše di latelago.

“Tšweletšo ye ga e ame dinyakišišo tša bosenyi tšeo di tšwelago pele ntle le tšhitišo. Mohlankedi wa dinyakišišo o dira ka boikemišetšo ntle le khuetšo ya ka ntle, letšhogo, kgethollo goba leemo,” a realo.

Mbambo o re ba tšwela pele ka boikemišetšo ebile ba ikemišeditše go latela tshepedišo ya dinyakišišo ye e lego molaong, ya toka yeo e le go pepeneneng.