Bahlapetše ba tsela ba itokišitše go laola moela o mogolo wa sephethephethe ditseleng tša Limpopo

Dikete tša batho ba letetše go wela ditsela tša Limpopo mafelelo a beke ye, ba eya meletlong ya bodumedi, mafelong a boithabišo le meletlong ya setšo.

Ka fao, bahlapetše ba tsela ba re ba itokišitše go laola moela o mogolo wa sephethephethe. Kgoro ya Dinamelwa le Tšhireletšo ya Setšhaba ka Limpopo e tšere kgato ya go hloka kgotlelelo go baotledi bao ba sa latelego molao.

Mmoleledi wa kgoro, Tidimalo Chuene o re ba lemoša baotledi gore go kitima ka lebelo le legolo, go nametša baotledi ba go feta palo le go otlela sefatanaga seo se sa lokelago tsela di tla bewa leihlo ka kelohloko.

“Maphodisa le bahlapetše ba sephethephethe ba beakantšwe go lekola ditsela tše kgolo go akaretša N1, N11, R101, R81, R71, R579, R37, R36, R40, R528, R574, R516, R521, D4040, D19, R524 le R523,” a realo.

Chuene o re bašomi ba tla lwantšhwana le go fokotša pitlagano ditseleng le go netefatša polokego ditseleng nakong ye ya maeto a mantši.

Molekgotlaphethiši Violet Mathye, o kgopetše baotledi go ba le pelotelele le tlhokomelo.

“Ge Limpopo e amogela baeti bakeng sa mediro ya bodumedi le meletlo ya setšo, ke kgopela gore mootledi yo mongwe le yo mongwe a etiše tšhireletšo pele,” a realo.

Mathye o re ka tšhomišanommogo, ba ka kgona go thibela dikotsi tše di sa nyakegego. “Ka seo re tla  netefatša gore bohle ba fihla mafelong a bona ka tshireletšo,” a realo.