Motšofadi o thopilwe, a bethwa gomme a gapeletšwa go bolla

Le ge ba bantši ba ketekile go boa ga bana ba bona ka polokego go tšwa dikomeng mafelelong, motšofadi Mahlankane Mathobela o sa tšhošitšwe ke ka moo a ilego a thopša lego gapeletšwa go bolla.

Mathobela (72) go tšwa motseng wa Mamatsha ka Ga-Molepo ka ntle ga Polokwane o boletše gore o be a le ka ntlong ya gagwe a enwa bjala bya setšo ge sehlopha sa banna le bašemane ba thuba sefero sa kgoro ya gagwe, ba mmetha gomme ba mo gogela thabeng ya kgauswi moo a ilego a bolotšwa ka kgapeletšo. 

Metsotswana ka morago ga moo,moagišani wa gagwe Sipho Phoshoko (39) le yena o ile a thopša legaeng la gagwe gomme a išwa thabeng eupša ka morago ga go bethwa, bathopi ba gagwe ba ile ba lemoga gore o bolotšwe, gomme o ile a kgona go tšhaba bošegong bjona bjo. 

Mathobela o ile a bollwa ka kgapeletšo gomme a fetša bošego ka moka a letilwe pele a hlakodišwa ke bahlankedi ba mmušo letšatšing le le latelago gomme a išwa bookelong.

Mathobela o boletše gore ga a dumele mo lebollong, le gore batswadi ba gagwe ga se ba ke ba mo gapeletša. 

Mokhomišenare wa maphodisa a profense Molefotenente General Thembi Hadebe o ile a sola ditiro tše tša dikgaruru.

“Le ge re amogela bohlokwa bja dikoma, se, ga se ya swanela go šomišwa bjalo ka sedirišwa sa go tšhošetša, bošoro, goba go tšea karolo ka kgapeletšo. Boitshwaro bjo bjalo bja bosenyi bo nyenyefatša yona ditekanyetšo tšeo ditšo tša setšo di reretšwego go di thekga,” a realo.

Batho ba bararo, go akaretšwa le ngaka ya setšo, ba tšweletše kgorong ya tsheko ya Mmaseterata ya Mankweng bekeng ya go feta ka Labobedi ka ditatofatšo tša go hlasela ka maikemišetšo a go gobatša mmele o šoro, go hlasela ka tlwaelo le go thopa. 

Yo mongwe le yo mongwe wa bona o ile a lokollwa ka peile ya R2,000, gomme molato wa bušetšwa morago go fihla ka la 18 Lewedi.