Mogaši wa go tuma wa dipapadi Phumlani Msibi o hlokofetše

SuperSport e tsebišitše ka lehu la mogaši le motšweletši wa dipapadi thelebišeneng

Phumlani Msibi ka Labohlano.

 

Msibi, yo a be go a tsebjago bjalo ka “Mr Msibi”  o hlokofetše ka Labohlano morago ga bolwetši bjo bo kopana a na le mengwaga ye 57.

 

“SuperSport e mahlokong ka go lahlegelwa ke mogaši wa yona wa kgwele ya maoto le tša matswele, e bile e le motšweletši, Phumlani Msibi, yo a hlokofetšego ka Labohlano, ka morago ga bolwetši bjo bokopana a na le mengwaga ye 57,” setiši sa television sa realo.

 

Setiši se hlalositše Msibi yo a belegwego ka la 15 Dibatsela 1967 kua Durban, bjalo ka moanegi wa dikanegelo yo a be go a na le phišego le bokgoni bjo bogolo, yo a be go a rata kgwele ya maoto le ditlhaloso le tshekatsheko ya tša matswele.

 

Mohlankedimogolophethiši wa SuperSport Rendani Ramovha o itše: “Msibi e be e le yo mongwe wa bagaši ba dipapadi bao ba rategago kudu bao SuperSport e kilego ya ba le bona.O be a na le botumo bja go ba setsebi se se tšwetšego pele, yo a hlompšhago kudu ke dithaka tša gagwe le bašomi mmogo le yena e bile e le monna wa lapa yo a hlompšhago.”

 

 “Legatong la SuperSport le lapa la MultiChoice, re rata go ntšha matshidiso a rena go tšwa pelong go lapa la Msibi ka morago ga tahlegelo ye kgolo. Tahlegelo ya Msibi e ka se kwewe fela ke mogaši le borwarre bja kgwele ya maoto eupša ke setšhaba ka moka sa dipapadi ka kakaretšo. Re nyamišitšwe kudu ke go hlokofala ga gagwe,” Ramovha a realo.

 

Tona ya Dipapadi, Bokgabo le Setšo Gayton Mackenzie le yena o ile a hlompha Msibi go dikgokaganyo tša leago go X. 

 

O ngwadile gore: “Ke rata go iša matshidiso a ka go tšwa pelong go ya go lelapa la Msibi. O sepele gabotse monna mogolo.”

 

Mogaši mmogo le yena Thomas Mlambo o ile a phatlalatša gore: 

 

“Pelo ya ka e emetšwe. Ke lahlegetšwe ke go feta mošomi mmogo. Re lahlegetšwe ke monna wa maatla a go homola. Go ba gona ga Morena Msibi go boletše kudu ka mantšu a mabedi fela: “Megopolo hle?” Setu sa go feta ga gagwe se ntlogetše ke na le dikgopolo tšeo di sa arabjego.  Robala ka khutšo, Phumlani.”

Tša segopotšo le dithulaganyo tša poloko ya Msibi a se hlo di tsebagatšwa.