MOSADI WA LEPHODISA O BONWE MOLATO POLAONG YA MONNA WA GAGWE

Sajene wa maphodisa Kate Lindiwe Hlongwane (45) o bonwe molato wa polao ya monna wa gagwe ka maikemišetšo ke kgorotsheko ya godimo ya Pretoria.

Hlongwane yo a bego a šoma Seteišeneng sa Maphodisa sa Dube o bolaile monna wa gagwe, Russel Hlongwane (40) yo gape e lego tatago bana ba bona ba bararo.

Bohlatse bjo bo tšweleditšwego kgorong ya tsheko bo laeditše gore ka la 27 Pherekgong 2024, Hlongwane o etetše Nkadingala ka Soshanguve, JJ.  

Monna wa gagwe o ile a tsebišwa ke mohlapetši wa dikoloi gore koloi ya lapa e be e le lefelong leo le lego kotsing kudu.  Ke moka a tšwela pele go ya lefelong leo gomme a utolla Hlongwane a rerišana le sangoma.  O ile a mo laela gore a boele gae, gomme ba otlela ba boela lefelong la bona la bodulo kua Soshanguve Extension 7 ka dikoloi tše di aroganego.

Bošegong bja tšatšing leo, ge a fihla gae, monna o ile a fapana le Hlongwane mabapi le ketelo ya gagwe go Ngakeng ya setšo

gomme seo sa lebiša ngangišanong ye šoro. 

Mohu o ile a mo tsebiša gore o tla mo iša ntlong ya batswadi ba gagwe gore ba mo laye.

Ba ile ba thoma go nametša dilo tša Hlongwane ka sefatanageng sa bona gomme ba tloga mmogo.  Metsotso ye mmalwa ka morago, ka iri ya pele mesong, ba ile ba boela gae, moo Hlongwane a thuntšhitšego monna wa gagwe makga a mantši ka sethunya sa gagwe sa tirelo.

Ge a ekwa koloi e boa gomme go thunya ka dithunya kapejana ka morago ga moo, mošomi wa ka gae wa lapa o ile a tšwa ka ntle go yo nyakišiša.  O ile a kopana le Hlongwane, yo a ilego a hlokomologa nyakišišo ya gagwe ka ga lefelo la monna wa gagwe.  Mothuši o ile a tšwetša pele go tsoma ga gagwe gomme a hwetša mohu a robetše fase ka ntle ga kgoro ya bona, a tšwa madi a mantši kgauswi le ntlo ya moagišani.  

Moagišani, yo le yena a ilego a kwa go thunya ga dithunya, o ile a kitimiša mohlaselwa sepetlele sa Akasia, moo mafelelong a ilego a hwa ka baka la dikgobalo tša gagwe.  Hlongwane o swerwe ke SAPS ka lona letšatši leo, la 28 Pherekgong 2024, gomme molato wo o ile wa fetišetšwa go Bolaodi bjo bo Ikemego bja Dinyakišišo tša Maphodisa (IPID) gore go dirwe dinyakišišo tše dingwe.

Molato o, o  bušeditšwe morago go la 01 Dibatsela 2025 gore o ahlolwe.