SANTACO e latofatša dipolelo tša gore e gapeletša setšhaba go šomiša dithekisi

SANTACO e latofatša tshedimošo ya maaka yeo e phatlaladitšwego matlakaleng a dikgokagano yeo e rego e laetše maAfrika Borwa gore ba se šomiše dikoloi tša bona tša praebete gomme ba sepele le malapa a bona ka dithekisi.

SANTACO e gateletše gore ga se ya ntšha taelo yeo, ebile ga e gapeletše setšhaba go šomiša mohuta o mongwe wa go sepela.

“Motho mang le mang yo a dirago dipolelo tše bjalo ga a bolele legatong la SANTACO. Re kgala ka bogale phatlalatšo ya tshedimošo ya maaka,” gwa realo mmoleledi wa SANTACO, Rebecca Phala.

Phala o re ba gopotša setšhaba gore ditirelo tša dithekisi, bjalo ka ditirelo tše dingwe ka moka tša go lefišwa, di a ikgethelwa gomme di dula e le kgetho ya banamedi.

“Re hlohleletša babegi ba ditaba gore ba netefatše tshedimošo pele ba e phatlalatša, ka gore ditaba tša maaka di ka timetša setšhaba mme tša senya tshepo mešomong ya dithekisi,” a realo.

O re ke maphodisa fela ao a nago le maatla a semolao a go tiiša melao ya dinamelwa mo Afrika Borwa. “Re hlohleletša setšhaba gore se bege ditiragalo tša kgapeletšo go maphodisa goba ditšhupetšo tša semolao tša maleba,” gwa realo Phala.