Ramathuba o befeditšwe ke RAL ka lebaka la tsela yeo e sa felago ka morago ga mengwaga ye 7

Ka Mogale Mohale

Tonakgolo ya Limpopo Ngk Phophi Ramathuba o kgadile Roads Agency Limpopo (RAL) ka bogale.

 

Se se tla ka morago ga gore projeke ya dimillione ya tsela ya Morebeng go la Sekgosese ka ntle ga Modjadjiskloof e tsielwe ka morago ga mengwaga ye šupa.

O re RAL e swanetše go jewa ke dihlong ka ge presidente, tona, tonakgolo le molekgotlaphethiši ba ile ba mengwa go tla projekeng ye.

 

“O bitša president go kopana le badudi mme wa ba tshepiša gore tsela e tla fela. Le lehonu, ga se e fele,” a realo.

 

O re o kwa a swabile mme a ka se kgone go lebagana le Presidente Cyril Ramaphosa go fihla tsela e fela.

 

“Ge o filwe maikarabelo go RAL go ba maemo a mangwe projekeng ye, o swanetše go tseba gore ke tseleng. Ge tsela ye e ka se fele, mešomo e ile go fela,” a realo.

 

Ramathuba o re o nyaka go tseba moaba tirelo, go re o hweditše bjang mošomo gammogo le bokgoni le maitemogelo a gagwe.

 

“Re ka botšana maaka, efela o ka se bitše hlogo ya mmušo wa dira gore a lebelelege bjalo ka sesegišwa. Re swanetše go šireletša hlogo ya mmušo ge re ithata. Ge o tseba gore ga o na bokgoni, ke nako ya gore o re kgopele gore re go lokolle,” a realo.

 

Projeke ye e be e akaretša go tsosološa tsela ya 36km go tloga go mobu go ya go sekontiri gammogo le go aga maporogo a 2 le go lokiša le lengwe.

 

Badudi ba re ba lahlegetšwe ke tshepo ya gore tsela ye e tla fetšwa. David Rasebotja (40) o re leeto leo le tšeyago metsotso ye 30 le tšeya iri tše pedi ka lebaka la tsela ye.

 

“Go ba boima go otlela ka nako ya dipula. Ekonomi ya motse wa rena e amega bošaedi. RAL e swanetše go jewa ke dihlong mme re holofela gore Ramathuba o be a sa bolediši ke go bona batšeya diswantšho. Tsela yeo e swanetše go fela,” a realo.