Mmoleledi wa mmasepala o golegilwe ka lebaka la maitekelo a polao ya mosadi wa gagwe

Ka Mogale Mohale

Mmoleledi wa masepala wa Mogalakwena, Malesela Selokela (42) o tšweletše pele ga kgoro ya tsheko ya Mahwelereng ka Laboraro, 2 Mosegamanye.

Se ke ka morago ga gore a golegwe ke maphodisa a selete sa Waterberg ka Laboraro melatong ye 2 ya maetekelo a polao, go kata, go betha, go senya thoto, go tšeya motho ka kgang gammogo le go tshela molao wa taelo ya tšhireletšo.

Gothwe o bethile mosadi wa gagwe wa mengwaga ye 34 go tloga ka kgwedi ya Hlakola 2021 nakong ya ge a sepela lapeng la bona la lenyalo go thoma tshepedišo ya hlalano.

Molato wa Selokela o šotišeditšwe go Labobedi, 8 Mosegamanye mo a tla go go dira kgopelo ya peili.

Mokhomišinare wa maphodisa a Limpopo, Leutenant-General Thembi Hadebe o lebogile maphodisa ao a swerego mogononelwa.

“Motho mang le mang yo a tlaišago basadi le bana o ile go rutwa molao ntle le go lebelela maemo ao a swerego setšhabeng,” a realo.

Hadebe o re setšhaba se tiišetšwa gore maphodisa a dula a itokišitše go lwantšhana le dikgaruru tša bong.