Moruti o swerwe molatong wa go kata mosetsana

Moruti wa mengwaga ye 40 o swere ka lebaka la go belaelwa ka go kata mosetsana wa mengwaga ye 14.

Tiragalo ye e diregile ka Laboraro, 9 Mosegamanye kerekeng ya moruti yo go la Sibasa, kgauswi le Thohoyandou, Limpopo.

Go begwa gore moruti o ile a laetša mosetsana yo gore a tle kerekeng gomme ge a fihla a hwetša a le noši ka ofising ya gwagwe.

Mosetsana o boletše gore moruti o ile a tswalela lebati gomme a mo gapeletša go dira dilo tša thobalano pele a mo kata makga a mmalwa. Ka morago ga tiragalo yeo, moruti o mo laetše gore a se bolele ka seo se diregilego.

Mmoleledi wa maphodisa a Limpopo Colonel Malesela Ledwaba o re mosetsana o ile a ba le sebete sa go bolela ka seo se mo diragaletšego go lapa la gagwe ka Mokibelo, 19 Mosegamanye.

“Maphodisa a ile a tsebišwa ka pela, gomme molato wa kato o ile wa ngwadišwa le go nyakišišwa. Molatofatšwa o swere ka Sontaga, 20 Mosegamanye mme o ile go tšwelela pele ga kgoro ya tsheko ya Thohoyandou ka Mošupologo, 21 Mosegamanye go araba molato wa kato,” gwa realo Ledwaba.

Ledwaba o re maphodisa a sa nyakišiša tiragalo ye.

Mokhomishinare wa maphodisa a Limpopo Lieutenant-General Thembi Hadebe o retile sebete sa mosetsana yo ka go iponagatša le go bega tiragalo ye ye šoro.

“Re hlohleletša batswadi le bahlokomedi gore ba dule ba boledišana le bana ba bona gomme ba bege dipono tša go belaetša ka pela,” a realo.