Tonakgolo Ramathuba o swere kopano go rarolla bothata bja tlhaelo ya meetse seleteng sa Vhembe

Tonakgolo Ngk Phophi Ramathuba swere kopano ya maemo a godimo go rarolla bothata bjo bo tšwelago pele bja tlhaelo ya meetse seleteng sa Vhembe.

Kopano ye ya meetse yeo e swerego meagong ya masepala wa Vhembe ka Labohlano, 26 Lewedi e kopantšhitše baetapele ba mmušo, mekgatlo ya bašomi, boetapele bja setšo, setšhaba le batšeyakarolo.

Tonakgolo Ramathuba o re kopano ye e lebeletšwe go kopanya maano, go tliša mmogo didirišwa le go fihlelela ditharollo tša maleba tša go rarolla bothata bja meetse bjo bo tšwelago pele mo seleteng se.

“Meetse ga se tirelo ye e tlwaelegilego feela eupša ke tokelo ya motheo wa molaotheo le taba ya seriti. Re ba le kopano ye ya meetse gore re kgone go hlama ditharollo mmogo tšeo di tlago netefatša gore batho ba rena ba hwetša meetse ka mehla,” gwa realo Ramathuba.

O re legato le le tla ka nako yeo ditšhaba tša Vhembe di tšwelago pele go lebana le tlhaelo ya meetse. “Ka fao, mmušo o lebeletšwe go fa ditharollo tša maleba tša goya go ile,” a realo.