Hlogo ya sekolo e fegilwe mošomong morago ga go latofatšwa ka go hlekefetša morutwana wa lekgarebe ka tša thobalano

Kgoro ya Thuto ka Limpopo e fegile hlogo ya sekolo ya mengwaga ye 51 mošomong mme e tla thoma ka dinyakišišo.

Hlogo ya sekolo, Cornelius Sebothoma, o begilwe gore o hlekefeditše lekgarebe la morutwana la mengwaga ye 17 ka tša thobalano sekolong se se lego Lebowakgomo ka ntle ga Polokwane sedikothutong sa Capricorn South ka Mokibelo, 16 Phato.

Go ya ka dipego, morutwana o be a ile ka kantorong ya hlogo ya sekolo go tšeya mogala wa gagwe wa letheka woo o bego o tšere ke morutiši nakong ya dithuto.

Go begwa gore morutwana yo o lekile makga a mantši go tšeya mogala wa gagwe ka kantorong, eupša a palelwa ka ge hlogo ya sekolo e be e se gona.

Mmoleledi wa maphodisa a Limpopo, Brigadier Hlulani Mashaba o re ka Mokibelo ge morutwana a boela go tšeya mogala, hlogo ya sekolo e ile ya mmotša gore a tle a le tee ka kantorong.

“Morutwana o ile a laela mogwera wa gagwe gore a eme ka ntle pele a tsena ka kantorong, moo go begwago gore hlogo ya sekolo e mo kgomile ka tsela ye e sa swanelago gomme ya mo hlekefetša ka tša thobalano,” gwa realo Mashaba.

Morutwana o ile a bega tiragalo ye go lapa la gagwe, gomme taba ye ya begwa setišing sa maphodisa a Lebowakgomo ka Laboraro, 20 Phato.

“Mogononelwa o ile a swarwa mme a pharwa ka molato wa hlekefetšo ya thobalano. Sebothoma o tšweletše pele ga Kgorotsheko ya Polokwane moo a filwego beile ya R3 000 gomme molato o šotišeditšwe go Mošupologo, 20 Diphalane,” a hlaloša Mashaba.

Molekgotlaphethiši wa Thuto, Mavhungu Lerule Ramakhanya o re ditatofatšo tše ke pušetšo morago go maiteko a go lwantšhana le ditshohlego tša bong gammogo le go šireletša ditokelo tša barutwana.