Morwa o golegilwe morago ga gore mmagwe a remelelwe go fihlela a hlokofala

Monna wa mengwaga ye 40 o golegilwe ka morago ga gore  mmagwe a hwetšwe a remelešwe gomme ditho tša mmele wa gagwe di beilwe ka gare ga dikotlelo.

Tiragalo ye ya masetlapelo e diragetše motseng wa Sebora ka Mashashane ka tle ga Polokwane ka Limpopo.

Mmoleledi wa maphodisa a profense Malesela Ledwaba o re ba utollotše ditho tša mmele wa mokgekolo wa mengwaga ye 87 ka gare ga dibjana tše tharo tša polasitiki gammogo le saga le dithipa, tšeo go thwego di šomišitšwe polaong ye.

Dibetša tše mmalwa tšeo go thwego di šomišitšwe go direng bosenyi bjo le tšona di hweditšwe lefelong la tiragalo. 

 “Mogononelwa yo e lego morwa wa mohu o swerwe ka morago ga gore a palelwe ke go fa tlhalošo ye e kgotsofatšago ya tiro ye e šiišago. Maikemišetšo a polao ye ya masetlapelo e nyakišišwa ke maphodisa,” Ledwaba o boletše. 

Mokhomišenare wa maphodisa a Limpopo, General Thembi Hadebe o ile a sola ka maatla tiragalo ye. 

Hadebe o rile mogononelwa o be a swanetše go fa mmagwe tšhireletšo e sego go mmolaya. 

 “Leuba la dikgaruru tša bong le fihlile ntlheng ya mathata. Leuba le le nyaka gore mafapha ka moka a setšhaba a kopane le maphodisa le go lwantšhana le matemona ao a tšwelago pele go tšhoša ditšhaba. Go lekane go lekane,” a tlaleletša Hadebe.

Mogononelwa o tla tšwelela pele ga kgorotsheko ya Magistrata ya Seshego ka Mošupologo, 30 June 2025 a lebane le molato wa polao.