Maphodisa le mohlwekiši Seteišeneng sa Maphodisa ba swerwe ka lebaka la go utswa sesepe sa go hlatswa

Maphodisa a mabedi le mohlwekiši wa kakaretšo go tšwa Seteišeneng sa Maphodisa sa Modimolle ba swerwe ka lebaka la go hula sesepa sa go hlatswa sa lerole.

 

Tiragalo ye e diregile bekeng ye e fetilego ge lori yeo e bego e rwele disepe tša go hlatswa e fapoge go tloga tseleng ya R101 kgauswi le Modimolle, ya tšhollela merwalo ya yona ka thoko ga tsela.

 

Go bewa gore maphodisa  ao, a utswitše sesepe loring yeo e thutšego gomme ba leka go bipa bosenyi bjo.

 

Mmoleledi wa maphodisa a profense Colonel Malesela Ledwaba ore ge mootledi a leka go šireletša lefelo leo la kotsi, babogedi ba ile ba thoma go hula dithoto.

 

Ledwaba o re go e na le go emiša go thopša ga dithoto, maphodisa a mabedi ao a bego a apere yunifomo mmogo a ile a hula sesepe seo ba se tsentšha ka koloing ya SAPS yeo e swailego gomme ba tšhaba lefelong la tiragalo, ba tlogela mootledi wa lori.

 

Ledwaba o re molato o butšwe morago ga gore mootledi a hlaole bagononelwa.

 

 “Banyakišiši ba hweditše dithoto tše di utswitšwego ka gae ga mohlankedi o tee gomme ba kgokaganya mogononelwa wa boraro, mohlwekiši wa seteišene sa maphodisa, le bohodu bjo,” a tlaleletša.

 

 Bagononelwa bao ba bararo ba mengwaga ya magareng ga 49 le 55 ba tla tšwelela pele ga Kgorotsheko ya Mmaseterata ya Modimolle ka Mošupologo, 21 Phupu 2025. 

Mokhomišenare wa Maphodisa a profense General Thembi Hadebe o boletše gore go a nyamiša ge bao ba gafetšwego go thekga molao ba roba tshepo yeo.

 

“Bomenetša le boitshwaro bja bosenyi ka gare ga maemo a SAPS di ka se kgotlelelwe. Re ikgafile go netefatša boikarabelo maemong ka moka,” a realo Hadebe.

 

Dinyakišišo di a tšwela pele gomme go letetšwe go swarwa ga tlaleletšo.