Baotledi ba re meyara Mpe a fetše leporogo go ba a role modiro

Ka Mogale Mohale

Baotledi ba lapišitšwe ke go dula ba latetšwe ka lebaka la sephethephethe letšatši ka letšatši.

 

Se ke ka lebaka la leporogo la dimillione leo le thomilwego ka 2019 efela le pala go fela mmileng wa Nelson Mandela Drive kgauswi le Seshego, Limpopo.

 

Projeke ye e tsietšwe ka ge rakontraka a tlogetše mošomo. Mmila wo o kgokaganya badudi ba Seshego le toropo ya Polokwane.

Prokjeke e šaletše morago ka lebaka la mathata a go akaretša didirišwa tša go aga le dikgakgano magareng ga rakontraka le di engineers. Ga bjale badudi ba nyaka gore meyara wa masepala wa Polokwane, John Mpe a role modiro.

 

Se ke ka lebaka la gore ba gapeletšega go otlela sephethephetheng nako ye telele, mme se se šitela kudu bašomi.

 

Ba bangwe ba baotledi ba megile ka gare ga dikotsi ka morago ga go wela ka fase ga leporogo leo, ba tšwa dikgobalo le difatanaga tša senyega.

Yenngwe ya dikotsi e diregile ka kgwedi ya Moranang moo mootledi wa VW Polo a wetšego ka leporong, sefatanaga sa senyega.

 

Baotledi ba nyaka gore Mpe a lokiše bothata bjo goba a role modiro. Johannes Ralekgokgo (41) o re o tshwenywa ke go se fele ga leporogo le.

 

“Re dula re ngwapana le beng mešomo ka gore re dula re latetšwe ka lebaka la sephethephethe. Go dula go direga dikotsi ka gore baotledi ba otlela ka go fela pelo. Go bonagala okare kontraka ye e tla fela ditorong tša rena,” a realo.

 

Mmoleledi wa masepala, Thipa Selala o re engineer ya mathomo e hlakane le mathata ao a hlodilego dikgohlano le rakontraka, mme se sa dira gore ba kgaotšwe.

 

“Engineer le rakontraka ba baswa ba kgethilwe, efela rakontraka yoo le yena o hlakana le mathata. Projeke e letetšwe gore e tla fela ka kgwedi ya Lewedi 2025,” a realo.