RASAENTSHE WA LIMPOPO O THOPILE SEFOKA SA BODITŠHABATŠHABA KA DINYAKIŠIŠO TŠA GAGWE KA DIBETIRI TŠA LETSWAI
Motšeakarolo wa PhD ka Fisiki Yunibesithing ya Limpopo Keletso Monareng o kgethilwe bjalo ka yo mongwe wa bafenyi ba Difoka tša bo 7 tša L’Oréal-UNESCO Bakeng sa Basadi ba Saense 2025.
Keletso o belegwe le go godišetšwa Motseng wa Ga-Sekororo kgauswi le Tzaneen.
Mošomo wa gagwe o lebišitše tlhokomelo go dibetri tša sodium-ion, e lego selo se sengwe se se bolokegilego, se se sa bitšego kudu le seo se sa senyetšego tikologo go e na le dibetri tša lithium. Go e na le lithium e nago le mpholo, dibetri tše di diriša letswai, e lego seo se dirago gore polokelo ya matla e hlweke le e swarelelago.
Difoka tše di keteka boramahlale ba basadi ba go ikgetha bao dinyakišišo tša bona tša boitlhamelo di lebanego le ditlhohlo tše di gateletšago kudu tša Afrika, go akaretšwa tlhokomelo ya kankere, malwetši a go fetela, meetse a hlwekilego, maatla a go ya go ile, le pabalelo ya tikologo.
Keletso o boletše gore leeto la gagwe le hlohleletšwa ke maikemišetšo le go rata go tseba.
O itše: “Ke be ke dutše ke kgahlwa ke kamoo thutamahlale e ka neago ditharollo tše di swarelelago tša mathata a letšatši le letšatši.”
O okeditše ka gore: “Nyakišišo ya-ka e ikemišeditše go hlama thekinolotši ya matla a hlwekilego le yeo e sa bitšego kudu yeo e fokotšago go tšweletšwa ga dikgase tša go hlola boso mola e nea mekgwa e mengwe e ka botwago go e na le dibetri tša lithium-ion.”
CEO ya L’Oréal Afrika Borwa, Serge Sacre, o boletše gore ka bafenyi ba seswai ba ngwaga wo, lenaneo le le hlompha palomoka ya boramahlale ba basadi ba 50, e lego seo se swayago kgato ye bohlokwa yeo e laetšago peeletšo ya go ka ba R5 milione.
