Molekgotlaphethiši wa kgoro ya Dinamelwa le Tšhireletšo ya Setšhaba, Violet Mathye o lekotše lefelo la kotsi ya bese yeo e fetilego ka maphelo a basadi ba bane
Basadi ba bane ba hlokofetše gomme ba bangwe bao ba fetago 50 ba gobetše nakong ya ge bese e amega kotsing tseleng ya R81 Ga-Sekgopo ka ntle ga Modjadjiskloof bošegong bja Mokibelo, 9 Phato.
Go ya ka pego ya mathomo, mootledi o lahlegetšwe ke taolo ya bese gomme ya phutlama. Basadi ba bane ba hlokofetše lefelong la kotsi, mola ba 8 ba gobetše magato a magareng. Ba bangwe ba 45, go akaretša le mootledi wa bese, ba hweditšwe ba na le dikgobadi tše nnyane.
Ba bangwe bao ba gobetšego ba išitšwe bookelong bja Kgapane, Mankweng le Van Velden go hwetša tlhokomelo ya maleba ya maphelo. Seo se hlotšego kotsi se ya nyakišišwa.
Ka Sontaga, 10 Phato, molekgotlaphethiši wa kgoro ya Dinamelwa le Tšhireletšo ya Setšhaba, Violet Mathye gammogo le molekgotlaphethiši wa kgoro ya Maphelo, Dieketseng Mashego ba etetše bao ba phologilego kotsing ye. Sehlopha se gape se lekodišitše lefelo la kotsi le go lekola ditlaleletšo tša dinyakišišo tša mathomo.
MEC Mathye o rometše melaetša ya gagwe ya go homotša malapa ao lahlegetšwego ke baratiwa gomme a lakaletša bao ba gobetšego gore ba fole ka pela.
“Re kgopela gore baotledi ka moka ba hlomphe melao ya tsela, ba hlokomele difatanaga tša bona, le go bea polokego pele gore ba fihle mafelo a bona ba phela,” a realo.
