Ba amogedi ba mphiwafela wa Sassa ba go feta 200 000 ba tla diega go gola kgweding ya June  

Ditefo tša June tša ba amogedi ba mphiwafela wa Sassa bao ba ka bago 210 000 di tla diega.  Go ya ka Sassa, se ke ka lebaka la gore go hweditšwe gore ba amogedi bao ba mphiwafela  ba hwetša letseno leo le sa utollwago go setheo.

Mmoledi wa Sassa Paseka Letsatsi o boletše gore go ya ka Molao wa Thušo ya Leago le melawana ya wona, ba amogedi ba swanetše go utolla ka botlalo methopo ka moka ya letseno ge ba ngwadiša mphiwafela la mathomo. 

 “Ba tlamegile gape go tsebiša SASSA ka diphetogo dife goba dife maemong a bona a ditšhelete ka morago ga ge kgopelo ya bona e amogetšwe. Go palelwa ke go obamela dinyakwa tše go bopa go tshela Molao gomme go ka feletša ka magato a phošollo” Letsatsi o boletše.

O boletše gape gore bjalo ka karolo ya maitapišo a, ditefelo tša dithušo tša leago go baholegi bao ba amegilego di tla diega mo modikologong wa ditefelo tša Mosegamanye.

“Batho ba ba swanetše go itlhagiša dikantorong tša bona tša kgauswi tša selegae tša SASSA bakeng sa tshekatsheko ya dithušo mo matšatšing a 30 go tloga letšatšikgwedi le la tsebišo, go sepelelana le Molawana wa 30 wa Molao wa Thušo ya Leago. Baholegi bao ba palelwago ke go obamela tshepedišo ye ba ipea kotsing ya gore dithušo tša bona di emišwe. Go se obamele mo go tšwelago pele go ka lebiša go fedišweng ga dithušo tša bona sa ruri,” a tlaleletša.

Go ya ka Letsatsi, maitapišo a a ikemišeditše go netefatša gore baholegi ba tiišetša diphetogo dife goba dife maemong a bona a ditšhelete le gore ba mpshafatše dintlha tša bona tša motho ka noši.