Lorna Modiba hweditšwe a hlokofetše ka morago ga go timela beke tše tharo

Ka Mogale Mohale

Lapa la ga Modiba le goga boima go amogela lehu la ngwana wa bona.

Se se tla ka morago ga gore Lorna Modiba (38) gotšwa motseng wa Ga-Mamatsha go la Ga-Molepo ka ntle ga Polokwane, Limpopo a hwetšwe a hlokofetše.

O bonwe la mafelelo a etšwa ga gabo ka Labohlano, 6 Phupu, go fihla ge a tlo hwetšwa a hlokofetše.

Go timelela ga gagwe go ile gwa tšhoša badudi, kudu bao ba hweditšego sefatanaga sa gagwe sethokgweng kgauswi le lapa la gagwe efela yena a sego.

Tšeo di hlotšego go timelela gammogo le lehu la gagwe ga di tsebegi ka se sebaka efela maphodisa a tsene fase ka dinyakišišo.

Meyaraphethiši wa Polokwane, John Mpe o etetše lapa le ka Laboraro, 2 Mosegamanye go iša mantšu a hlobošo le go ba thoba matswalo.

Mpe o re bjalo ka mmušo ba ile go thoba ba lapa. “Re kwa bohloko efela re tla tšwela pele re thekgana le ba lapa. Se bohlokwa ke gore mmago rena a bolokwe ka seriti. Go se ke gwa ba le motho yo a ganetšago o mongwe go lla ge a kukegile maikutlo gore ba kgone go fola,” a realo.

O re ba kgoro ya Hlabologo ya Leago ba šetše ba thomile go šoma le ba lapa gore meboya ya bona e thobege.