Ramathuba o galefešitšwe ke moetapele wa MK Party ka morago ga go hlatha Nkateko Mkhabela bjalo ka ‘iShangane go tšwa Limpopo’

Ka Mogale Mohale

Tonakgolo ya Limpopo Ngk Phophi Ramathuba o galefišitšwe ke lentšu la ‘iShangane’

 

Lentšu le le boletšwe ke moetapele wa liki ya baswa ya mokgatlo wa Umkhonto Wesizwe, Qiniso Cibane nakong ya ge ba thakgola liki ya bona go la KwaZulu-Natal ka Mošupologo, 16 Phupu.

 

Se se tla ka morago ga gore Cibane a hlathe leloko la mokgatlo, Nkateko Mkhabela bjalo ka “iShangane go tšwa Limpopo,” mantšu ao setšhaba se a kgadilego ka bogale.

 

Ramathuba o re mantšu a a bonwa bjalo ka pušetšo morago mme a tsosološa maikutlo a nako tša kgatelelo.

 

O re lentšu la ‘iShangane’ le be le šomišwa kgale go nyefola batho, la ba tšola setšo le bong bja bona.

 

“Polelo yeo ga e dumelelege leetong la rena la go aga Afrika Borwa yeo e hlomphago ditšo tša yona,” a realo.

 

Ramathuba o tiišitše maikemišetšo a gawe a go šireletša seriti sa badudi ba Limpopo. “Ga se ra swanelwa ke go kgotlelela mabaka a go hlaloša tšhomišo ya mantšu a thogako. Bao ba šomišago mantšu ao ba swanetše go itekola mme ba ikemišetše go fetoga ka nnete,” a realo.

 

Cibane o kgopetše tshwarelo phatlalatša, efela Ramathuba ga se a kwane le tshwarelo yeo ka ge a e bitša gore ke tshwarelo yeo e sa kgopelwago ka pelo ka moka. O re o palelwa ke go lemoga tshenyo yeo ae dirilego ya kgethologanyo ya semorafe.

Ramathuba o ipeleditše go tshwarano ya botee le hlompho go ma Afrika Borwa ka moka.

 

Ge a kgopela tshwarelo, Cibane o re mantšu a gagwe a tšerwe thoko. “Ke be ke kgala maitshwaro mpe nakong ya ge Mkhabela a bolela. Ke kgopela tshwarelo go bao ba kwago gore ke ba kgopišitše. Ke be ke šireletša Mkhabela le mokgatlo,” a realo.

 

O re mokgatlo wa MK ga se wa badudi ba KZN fela, eupša ke wa diprofense ka moka.