Liki ya baswa mokgatlong wa ANC ka Limpopo e nyaka mabone a matala
Ka Mogale Mohale
Liki ya baswa mokgatlong wa African National Congress (ANCYL) Limpopo e nyaka mabone a matala.
Liki e thakgotše ntwa ya go nyaka seo e re go e se swanetše, mme ke gore modulasetulo Faith Sebopela e be molekgotlaphethiši.
Mongwaledi wa liki, Phineas Sebola o re ba swere kopano ya lekgotla ka Mokibelo, 17 go fihla ka Sontaga, 18 Mopitlo moo ba tšerego sephetho se.
“Re tšere sephetho sa go lebagana le ANC mme re nyake gore Sepobela a thwalwe bjalo ka molekgotlaphethiši,” a realo.
O re sephetho se ga se sa liki fela. “Ke seemo seo se tsepamego sa lekgotlakomiti la ANC go akaretša baswa, gomme seo rena re se nyakago ke gore sephetho se se phethagatšwe,” a realo.
O re ke ka lebaka la gore ke baswa fela bao ba ka rwalago maikarabelo a go matlafatša ekonomi yeo e tla tšwelago baswa mohola.
“Go dikgahlegelo tša baswa, mmušo wa profense o swanetše go kgetha 50% ya baswa bjalo ka balaodi ba di poto (board) profense ka bophara. Se ke pitšo gore go lekodišišwe gape batho bao ba thwetšego gore baswa ba hwetše sebaka,” a realo.
Sebola o re dikantoro tša baswa di swanetše go šongwa ke baswa profense ka bophara. “Se ke pitšo gape go Tonakgolo Ngk Phophi Ramathuba gore a šome ka lebelo tshepedišong ya go phatlalatša mešomo ya kantoro ya baswa,” a realo.
O re ba ipiletša go šwalaganywa ga Gateway Airports Authority Limited (GAAL) go rarolla mathata a boemafofane bja Polokwane Gateway.
O re ba tšere sebaka go lekola seemo sa thuto gammogo le tšweletšo ya bokgoni go tšweletša ekonomi yeo e tiilego profense ka bophara.
“Re nyaka gore mašeleng a go lefela dikgopelo tša sekgoba sa go ithuta diunibesithing le dikholetšheng di fedišwe. Website tša mafelo a di swanetše go se šomiše data gomme thuto ya mahala e swanetše go tiišwa le gore go se lefiwe mašeleng go fihlelela thuto ya godimo,” a realo.
Nakong ya ge a kgwatha taba ya dikgaruru tša bong (GBV), o rile ba ipeletša go makala a bona ka moka go hloma lesolo la 10-Shamboks-A-Branch.
“Lesolo le le tla dira gore makala a dule a beile leihlo go dikgaruru tše 24/7. Ga gona ngwana go ba mosadi yo a swanetšego a tlaišwe makala a liki a lebeletše,” a realo.
