Hlogo ya sekolo e golegilwe ka lebaka la go tlaiša moithuti wa mosetsana ka tša thobalano

Hlogo ya sekolo ya mengwaga ye 51 e swerwe ka ditatofatšo tša

go tlaiša ka thobalano morutwana wa mengwaga ye lesomešupa.

Tiragalo ye e diragetše ka Mokibelo sekolong tsoko ka tikologong ya Lebowakgomo ka la 16 Phato 2025.

Go begwa gore morutwana yoo o be a ile ofising ya hlogo ya sekolo go yo tšea sellathekeng sa gagwe, seo se bego se tšerwe ke morutiši.

“Ka morago ga maiteko a mmalwa ao a sa atlegago a go tšea mogala, morutwana o ile a boela ofising ka taelo ya hlogo ya sekolo gore a tle a nnoši.  Go thwe nakong ya ketelo ye, hlogo ya sekolo e ile ya mo kgoma le go mo tlaiša ka thobalano ka mo go sa swanelago,Masjaba a realo.

Motšwasehlabelo o begile tiragalo ye go ba lapa la gagwe, bao ka morago ba ilego ba tsebiša Seteišene sa Maphodisa sa Lebowakgomo ka la 20 Phato 2025. 

Ka morago molato wo o ile wa fetišetšwa go Yuniti ya Dikgaruru tša Malapa, Tšhireletšo ya Bana le Melato ya Thobalano, gomme seo sa lebiša go golegweng ga hlogo ya sekolo ka pela le go latofatša ka go hlasela ka thobalano.

Molatofatšwa o rulaganyeditšwe go tšwelela kgorong ya tsheko ya Mmaseterata ya Thabamoopo ka la 21 Phato 2025.

Molefotenente General Thembi Hadebe, Mokhomišenare wa Maphodisa wa Profense ka Limpopo, o laeditše go tshwenyega ka tšhomišompe ya taolo ke batho ka bomong bao ba lego dikarolong tša thuto, a gatelela gore dikolo e swanetše go ba ditikologo tše di bolokegilego go bana.  Maphodisa a reta mohlaselwa ka sebete sa gagwe sa go tla pele le go kgonthišetša setšhaba gore molato wo o tla bewa leihlo kudu go netefatša gore toka e a phethagatšwa.