Maphodisa a nyaka bagononelwa morago ga gore masea a thopiwe bookelong bja Gqeberha

 

Maphodisa a Kapa Bohlabela a tsomana le basadi ba babedi bao ba gononelwago ka go thopa masea a mabedi ao a sa tšwago go belegwa sepetlele sa Dora Nginza ka Gqeberha bošegong bja Mošupologo.

Mmoleledi wa kgoro ya maphelo ya profense Sizwe Kupelo ore basadi ba ba hweditše phihlelelo go karolo ya pelego ya sepetlele ka fase ga mabaka ao a belaetšago. Go ya ka Kupelo, mohlapetši wa tšhireletšo o lekile go thibela basadi bao ge ba tsena ka phapošing ya go hlokomela balwetši ba rwele mokotla, eupša yo mongwe wa bona o kgonne go efoga mohlapetši gomme a tsena ka phapošing ya bana. 

“Ge re lekola khamera ya CCTV, mosadi o bonwa a rwele mokotla o tee gomme a šomiša tsela ya go tšwa ye e fapanego. Re ipiletša go setšhaba go thuša kgoro le maphodisa go nyaka masea a,” go boletše Kupelo, yo a okeditšego ka gore ditshwantšho tša CCTV di gafetšwe maphodisa gore di nyakišišwe.