DJ wa go tuma wa Limpopo o tšweletše kgorong ya tsheko ka molato wa go kata
Mogaši wa go tuma go tšwa Seleteng sa Vhembe, Limpopo o tšweletše kgorong ya tsheko ka ditatofatšo tša go kata.
DJ yo a šomago Choice FM ka Thohoyandou o swerwe ka Mošupologo ka molato wa go kata mosetsana wa mengwaga ye 6 wa leloko ka ntlong ya batswadi ba gagwe ka Mpheni Block B.
Mmoleledi wa maphodisa a Limpopo Brigadier Hlulani Mashaba ore DJ o swerwe morago ga dinyakišišo ka Waterval SAPS.
“Dipego di laetša gore tiragalo ye e diregile ka la 12 May ka iri ya boraro. Mmago ngwana yo, yo a bego a le Pretoria ka nako yeo, o tsebišitšwe ke koko wa ngwana gore ngwana yo ga a phele gabotse. Ge a boela gae, o ile a hwetša ngwana a šetše a išitšwe bookelong, moo tlhahlobo ya kalafo e tiišeditšego gore o hlasetšwe ka thobalano. Nakong ya dipoledišano, ngwana o utolotše gore mogononelwa o mmontšhitše dilo tše di sa swanelago pele a dira tlhaselo yeo go thwego e dirilwe,” Mashaba o boletše.
Mokhomišenare wa profense ya maphodisa a Limpopo Lieutenant General Thembi Hadebe ore go a tshwenya ge bao ba swanetšego go ba ba šireletša ba bana ke bona ka ba kwešago bohloko.
“Maemo a mogononelwa bjalo ka motho wa setšhaba le setho sa lapa a dira gore molato wo o re tshwenye kudu, ka ge o emela go eka mo go tseneletšego ga go bota,” a realo Hadebe.
DJ o ile a tšwelela la mathomo pele ga Kgorotsheko ya Maseterata ya Waterval ka Labobedi gomme molato o ile wa bušetšwa morago go la 27 Motsheganong 2025 bakeng sa kgopelo ya bail ya semmušo.
