Baotledi le badudi ba boifa gore leporo le ka phuhlama ka ge le palegile
Ka Mogale Mohale
Baotledi ba boifela maphelo a bona ge ba otlela tseleng ya R81.
Se ke ka lebaka la gore go na le leporogo leo le palegilego tseleng ye motseng wa Ga-Sekgopo ka ntle ga Modjadjiskloof, Limpopo. Leporogo leo le ile la tsosološwa nakong ya ge tsela ye e tsosološwa magareng ga 2019 le2021.
Baotledi ba boifa gore leporogo leo le ka phuhlama ka ge le tšwela pele go palega.
Ba re ke kgale leporogo le le seemong seo, ka fao ba boifa gore le ka phuhlama nako efe go ba efe.
Tumisho Selahla (35) o re tsela ye e swere karolo ya ekonomi ya profense.
“Go ile go ba bothata ge leporogo le ka phuhlama. Re rapela fela gore ge le phuhlama, go se be le mootledi go ba modudi yo a gobalago,” a realo.
Ba bangwe ba re ga ba na kgetho, ka fao ba gapeletšega go šomiša tsela yeo. “Ke dula Giyani mme ke šomiša tsela ye letšatši ka letšatši go ya mošomong Polokwane.
“Ke tsela ye kaone ya go kgaoletša. Re ipeletša go mmušo gore o dire ka pela go lokiša leporogo le pele le phuhlama,” gwa realo Nhlamulo Masingi (42).
Badudi ba re mediro e ile go ema ge leporogo leo le ka phuhlama.
“Se se ra gore bašomi ba ile go palelwa go ya mešomong, barutwana ba ka se ye dikolong gomme dikgwebo di ile go gwahlafala. Leporogo le le swere bophelo bja motse wo,” gwa realo James Mafa (29).
Ga bjale ba ipotšiša ka mošomo wo o dirilwego leporogong le, ka ge molete o ile wa bulega leporogong le lengwe gona tseleng ye ka 2021.
Ka poifo, ba ipeletša go SANRAL gore e lokiše leporogo pele le gobatša baotledi go ba badudi.
Mmoleledi wa SANRAL, Lwando Mahlasela o re ba tseba ka leporogo le. “Re lemošitšwe ka go palega ga leporogo, efela le palegile ka godimo fela. Ga se le palege ka fase. Bašomi ba rena ba ile go lokiša bothata bjoo,” a realo.
