Morutwana o hlokofetše morago ga go thulwa ke sefatanaga sa go nametša barutwana

Morutwana wa mphato wa bo bedi go tšwa sekolong sa fase sa Muhluri seleteng sa thuto sa Vhembe West o hlokofetše morago ga go thulwa ke sefatanaga sa go nametša barutwana.

Tiragalo ye ye šoro e diregile ka Labone mesong, 14 Phato. Go ya ka kgoro ya Thuto ya Limpopo, ngwana yo wa mosetsana wa mengwaga ye šupa o be a sa tšwa go fologa sefatanageng sa barutwana.

O be a leka go tshela tsela nakong ya ge a tlo thulwa. Bašomi ba ditirelo tša tšhoganetšo ba hlathile morutwana yo gore o hlokofetše lefelong la kotsi.

Molekgotlaphethiši wa kgoro, Mavhungu Lerule-Ramakhanya o netefaditše gore bašomi ba tša leago ba tla etela ba lapa la ngwana yo le sekolo ka Labohlano, 15 Phato go ba fa thobamatswalo ya maikutlo le mogopolo.

Molekgotlaphethiši Lerule-Ramakhanya o re kotsi ye bjalo ke ye šoro. “Lehu la ngwana wa sekolo le dula e le tlaišego go ba lapa ebile e le tahlego ye kgolo go setšhaba.

“Ke kwele bohloko kudu ka lehu la ngwana yo ka lebaka la kotsi yeo e diregilego. Pelo le mogopolo waka di na le ba lapa nakong ye e boima. Re tla ba fa thekgo ka moka yeo e hlokegago,” a realo. Maphodisa a nyakišiša seo se hlotšego kotsi.