Baagolwa ba 21 ba išitšwe bookelong go bollwa gape ka ge ba sa bollwa gabotse komeng
Ka Mogale Mohale
Baagolwa ba 21 ba išitšwe bookelong ka morago ga go bollwa bošaedi.
Baagolwa ba 21 go tšwa komeng ya Lesodi le Rantlakane go la Mokopane, Limpopo ba lemogilwe ke baoki gore ba bollwe gape.
Ba ba hlano ba thošitšwe mme ba lokollwa ka Labohlano, 11 Mosegamanye mme ba lokollwa ka lebaka la mathata a dipalo bookelong bja George Masebe.
Ba 16 ba bošeditšwe komeng tša bona gomme ba ile go išwa bookelong bja Mokopane ka Mošupologo, 14 Mosegamanye.
Molekgotlaphethiši wa kgoro ya Pušo Tirišano, Bodulo bja Batho le Merero ya Setšo, Basikopo Makamu o ile go etela dikoma tše go nyakišiša gore go diragetše eng.
Makamu o re o nyamišwa ke dipego tše. “Ka Labone ge bašomi ba kgoro ba dira mešomo ya bona, ba lemogile gore dikoma tše pedi di itemogela mathata a go ditela baagolwa,” a realo.
O re ge ba gopola ka matšatši ao a šetšego pele sehla sa dikoma se tswalelwa, kgoro ya Maphelo ka bookelo bja George Masebe e biditšwe go thuša.
“Ke karolo ya maikarabelo a rena go netefatša polokego le šireletšo ya baagolwa. Ka tšhomišani le kgoro ya Maphelo re dumela gore magato ao re a tšerego a be a hlokega go efoga mahu. Re ile go tšwela pele re lekola dikoma go netefatša gore di latela moalo,” gwa realo Makamu.
O re kgoro e gatelela pitšo ya gore beng dikoma, ngaka tša go bua tša setšo gammogo le bahlokomedi ba dule ba ntšhitše mahlo dinameng go efoga dikgobalo le go netefatša tšhireletšo ya baagolwa ge sehla sa dikoma se fihla mafelelong.
