SASSA e tla tšwela pele go sekaseka metente ya ba amogedi ba mphiwafela bao ba nago le letseno la tlaleletšo
Setheo sa Tšhireletšo ya Leago sa Afrika Borwa (SASSA) se boletše gore se tla tšwela pele go sekaseka dithušo tša baamogedi ba mphiwafela bao go gononwago gore ba na le methopo ye mengwe ya letseno yeo e sa utollwago.
Mmoleledi wa SASSA Paseka Letsatsi o boletše gore ba amogedi bao ba nepišitšwego ba swanetše go etela diofisi tša bona tša selegae moo go tla hlahlobja maswanedi a bona go bona ge eba ba sa swanelega go hwetša thušo ye.
Go ya ka Letsatsi, ba amogedi bao ba sa latelegi tshepedišo ye ba ipea kotsing ya go emišwa ga metente ya bona.
“Go se obamele mo go tšwelago pele go ka feletša ka go fedišwa sa ruri ga dithušo tša bona. Go sepelelana le tlhako ya molao ya Thušo ya Leago, go ya ka kolao, ba amogedi i ba tlamegile go utolla ka botlalo methopo ka moka ya letseno nakong ya kgopelo ya bona ya mathomo. Ba swanetše gape go tsebiša SASSA ka diphetogo dife goba dife maemong a bona a ditšhelete ka morago ga ge kgopelo ya bona e amogetšwe,” a realo.
Ka June, SASSA e diegišitše ditefelo tša motente go ba amogedi ba dithušo tša leago ba go feta 210,000 bao go bonagalago ba hwetša letseno leo le sa utollwago ka nnete go setheo.
“Go bohlokwa go gatelela gore ga go na dithušo tšeo di emišitšwego go fihla ga bjale. SASSA e no beakanya lenaneo la tefelo ya ba amogedi bao ba kgopetšwego go tsena go ya go hlahlobja,” Letsatsi a realo.
