Maaka a go tšeelwa difatanaga ka kgang maanong a go rekiša dikarolo a utollotšwe ka morago ga gore bagononelwa ba ipolele

Maphodisa o utollotše maano a bofora a go tšeelwa ga difatanaga go maanomabe a go rekiša dikarolo tša difatanaga.

Se se tla ka morago ga gore banna ba ba bedi bao ba begilego gore ke batšwadihlabelo tiragalong ya go tšeelwa difatanaga ba golegwe ka dikgonono tša bofora moo ba šomišanego go ripitla le go rekiša difatanaga tša bona.

Se se latela go hwetšwa ga sefatanaga sa maemo a godimo se se ripitlilwego ka nako ya tlhaselo ya maphodisa kua Nirvana, Polokwane.

Ka Laboraro, 9 Phupu tiragalo ya bohlale ya maphodisa e ile ya utolla sefatanaga sa Porsche Cayenne seo se be go se begilwe se utswitšwe ka kgwedi ya Mopitlo lefelong la Zebediela.

Sefatanaga seo se be se šetšwe se ripitlilwe diriparipa lefelong la go lokiša difatanaga le le lego tseleng ya Nelson Mandela Drive, Nirvana.

Phuruputšo yeo e latetšego mo lefelong le e ile ya tliša go hwetšwa ga sefatanaga sa bobedi sa Toyota Tazz yeo e begilwego e utswitšwe ka kgwedi ya Diphalane 2024 go la Seshego.

Mmoleledi wa maphodisa a Limpopo Colonel Malesela Ledwaba o re se se ile sa tsosa dipelaelo gomme sa hlola dinyakišišo tša go tsenelela mabapi le go ba molaong ga difatanaga tše le nnete ya ditatofatšo tšeo di begilwego.

“Balatofatšwa ba babedi, Paballo Masokameng (37) yo a belaelwago e le moetapele wa leano la sefatanaga sa Porsche, le Emmanuel Boshomane (37), mong wa Toyota Tazz ba ile ba golegwa  . Bobedi ba be ba begile difatanaga tša bona gore di utswitšwe ka maaka,” a realo.

Masokameng o tšweletše kgorongtsheko ya Polokwane ka Labobedi, 15 Mosegamanye ditatofatšong tša boradia, boaka le go tsenelela toka.

“Ka tiragalo ya bobedi, Boshomane, morutiši kholetšeng ya TVET o golegilwe ditatofatšong tša boradia, boaka, le go tsenelela toka. O tšweletše kgorongtsheko ka Labobedi, 15 Mosegamanye mme a hwetša peili ya R500. O letetšwe go boya kgorongtsheko ka Laboraro, 27 Phato,” gwa realo Ledwaba.

Mong wa lefelo la go lokiša difatanaga, Mustafar Hussain (49), go tšwa nageng ya Tanzania, o golegilwe nakong ya tiragalo ditatofatšong tša go ba le difatanaga tše di utswitšwego.

“O tšweletše kgorongtsheko ya Polokwane ka Labohlano, 11 Mosegamanye mme o sa le kgolegong. O letetšwe go dira kgopelo ya peili ka Laboraro, 16 Mosegamanye,” a realo.